«Таза Қазақстан» тұжырымдамасына мен болашақ ұрпақ алдындағы жауапкершілік тұрғысынан қараймын. Бүгінгі табиғат — тек қазіргі қоғамның игілігі емес, ертеңгі ұрпаққа қалатын ортақ мұра. Біз қоршаған ортаға қалай қарасақ, келешек ұрпақ та сол жағдайдың нәтижесін көреді. Сондықтан тазалық мәселесін бүгінгі күннің ғана емес, ұзақ мерзімді болашақтың мәселесі ретінде қабылдау қажет.
Бұл бастама бізге «тазалықты біреу келіп жасап береді» деген түсініктен арылуға мүмкіндік береді. Қоғамдық кеңістіктің тазалығы әр азаматтың әрекетіне байланысты. Бір адам қоқыс тастамауы мүмкін, екіншісі ағаш отырғызады, үшіншісі ауласын көгалдандырады, ал төртіншісі айналасындағы адамдарға экологиялық мәдениетті насихаттайды. Осындай шағын істер біріге келе үлкен қоғамдық өзгеріске айналады.
Менің ойымша, «Таза Қазақстанның» ең үлкен нәтижесі тазаланған көшелердің санымен ғана емес, адамдардың ойлау жүйесінің өзгеруімен өлшенуі керек. Егер адам табиғатты өзіне тиесілі байлық емес, кейінгі ұрпаққа аманат деп қабылдаса, онда тазалық тұрақты әдетке айналады. Нағыз таза Қазақстан — қоқысы аз ел ғана емес, табиғатына жауапкершілікпен қарайтын, қоғамдық ортаға құрметпен қарайтын және болашағын ойлайтын азаматтары көп ел.
Д.ТАЛҒАТҰЛЫ
