Қауіпсіз әрі тұрақты қоғамды тек мемлекеттік органдардың күшімен қалыптастыру мүмкін емес. Ол үшін билік пен халық арасында өзара сенім, ашық байланыс және әріптестік болуы қажет. Осы тұрғыдан алғанда, қоғаммен әріптестік — елдегі көптеген әлеуметтік мәселелерді шешудің маңызды тетігі.
Қоғамның әр мүшесі өз ауласында, мектебінде, жұмыс орнында немесе тұрғылықты жерінде болып жатқан мәселелерге немқұрайлы қарамауы керек. Қоғамдық тәртіптің бұзылуы, жастар арасындағы құқықбұзушылық, есірткінің таралуы немесе қоршаған ортаның ластануы сияқты мәселелерді дер кезінде байқап, тиісті орындарға хабарлау — азаматтық жауапкершіліктің бір көрінісі.
Сонымен бірге халықтың пікірі мемлекеттік органдар үшін маңызды болуы тиіс. Азаматтар өз мәселесін еркін жеткізіп, ұсыныс айтып, қоғамдық бастамаларға қатыса алғанда мемлекет пен қоғам арасындағы байланыс нығаяды. Мұндай әріптестік сенімге негізделсе, көптеген мәселе асқынбай тұрып шешімін табады.
Әсіресе жастарды қоғамдық жұмыстарға тартудың маңызы зор. Жастар түрлі еріктілер қозғалысына, әлеуметтік жобаларға, құқықтық сауаттылықты арттыру шараларына және қоғамдық бастамаларға қатысу арқылы өздерінің азаматтық ұстанымын қалыптастырады. Өз ортасына пайдасын тигізуге тырысқан жас қоғамның белсенді мүшесіне айналады.
Меніңше, қоғаммен әріптестік дегеніміз — жауапкершілікті бір-біріне жүктеу емес, керісінше, ортақ мәселені бірге шешу. Мемлекет өз міндетін сапалы орындаса, азаматтар өз жауапкершілігін сезінсе, ал екі тарап бір-бірін тыңдай білсе, қоғамда тұрақтылық қалыптасады.
«Бір жағадан бас, бір жеңнен қол шығару» қағидасы қазіргі қоғам үшін де өз маңызын жоғалтқан жоқ. Заң мен тәртіпті сақтау, есірткінің алдын алу, жастар қауіпсіздігін қамтамасыз ету және қоғамдық ортаны жақсарту — барлығымызға ортақ міндет. Сондықтан қауіпсіз ел құрудың ең мықты жолы — мемлекет пен қоғамның өзара сенімге негізделген серіктестігі.
