Соңғы уақытта құтырған иттерге қатысты оқиғалардың жиілеуі алаңдатарлық жағдайға айналып отыр. Бұл – тек бір ауданның немесе ауылдың ғана емес, жалпы қоғамның қауіпсіздігіне тікелей әсер ететін мәселе.
Құтыру – аса қауіпті жұқпалы ауру. Оның салдары ауыр, тіпті адам өміріне қауіп төндіреді. Сондықтан бұл мәселені тек ветеринарлық қызметтің жұмысы деп қарастыру жеткіліксіз. Мұнда тұрғындардың да жауапкершілігі ерекше маңызды.
Көшеде қаңғыбас иттердің көбейіп кетуі – бақылаудың әлсірегенін көрсетеді. Иесіз жануарларды уақытылы аулап, екпе жұмыстарын жүйелі жүргізу – жергілікті атқарушы органдардың басты міндеттерінің бірі болуы тиіс. Сонымен қатар, үй жануарларын ұстайтын азаматтар да оларды қараусыз қалдырмай, тиісті вакцина алып, қауіпсіздік талаптарын сақтауы қажет.
Қауіптің алдын алу – баршамызға ортақ міндет. Әйтпесе, бүгінгі бейқамдық ертең орны толмас өкінішке әкелуі мүмкін.
Бақыт АХМЕТОВА,
зейнеткер
