Бүгін елордада өткен Парламент палаталарының бірлескен отырысы тәуелсіз Қазақстанның саяси өміріндегі ерекше тарихи оқиға болды. Бұл жиын бір сессияның немесе бір шақырылымның жұмысын қорытындылаумен ғана шектелген жоқ. Ол – елдің мемлекеттік басқару жүйесінде жүзеге асқан ауқымды реформалардың нәтижесін саралап, Қазақстанның жаңа конституциялық кезеңіне аяқ басқанын айшықтаған маңызды белес.
Мемлекет басшысы Қасым-Жомарт Тоқаев өз сөзінде бүгінгі отырыстың тарихи маңызын ерекше атап өтті. Президенттің айтуынша, Парламенттің кезекті сессиясының аяқталуы – Тәуелсіз Қазақстан дамуының тұтас бір дәуірінің қорытындыланғанын білдіреді. Өйткені соңғы жылдары елдің саяси жүйесі түбегейлі жаңарып, мемлекеттік институттардың қызметі жаңа талаптарға бейімделді. Конституциялық реформалар аясында заң шығару жүйесі қайта қаралып, мемлекеттік биліктің жаңа архитектурасы қалыптасты.
Ертеңнен бастап жаңа Конституцияның заңды күшіне енуі – еліміздің құқықтық тарихындағы аса маңызды оқиға. Конституция – мемлекеттің негізгі заңы ғана емес, қоғамның дамуына бағыт-бағдар беретін басты құжат. Оның негізінде азаматтардың құқықтары мен бостандықтарын қорғаудың жаңа тетіктері қалыптасып, билік тармақтарының арасындағы жауапкершілік пен өкілеттіктер қайта айқындалды. Бұл өзгерістердің түпкі мақсаты – әділетті, тиімді және халыққа жақын мемлекеттік басқару жүйесін орнықтыру.
Президент өз сөзінде жаңа Конституциямен бірге мемлекеттік билік жүйесі де жаңа сипатқа ие болатынын айтты. Соның ең маңызды көріністерінің бірі – қос палаталы Парламенттің орнына жаңа Парламент – Құрылтайдың құрылуы. Бұл – мемлекеттік басқару құрылымындағы тарихи өзгеріс. Алайда оның мәні тек атаудың ауысуында емес. Жаңа институттың құрылуы заң шығару қызметінің сапасын арттыруға, халықтың мүддесін тиімді қорғауға және реформалардың сабақтастығын қамтамасыз етуге бағытталған.
«Бұл өзгеріс Қазақстанда тарихи сабақтастық бар екенін анық көрсетеді» деген Президент сөзі ерекше мәнге ие. Себебі кез келген мемлекет тұрақты дамуы үшін өткен тәжірибені жоққа шығармай, оны заман талабына сай жетілдіруі қажет. Қазақстан да дәл осы жолды таңдады. Елдің тәуелсіздік жылдарында қалыптасқан мемлекеттік институттары жаңа жағдайға бейімделіп, уақыт сұранысына жауап беретін басқару үлгісіне көшуде. Бұл – түбегейлі жаңару мен ұлттық мемлекеттіліктің сабақтастығының үйлесімді көрінісі.
Соңғы жылдары қабылданған жүздеген заңдар мен конституциялық актілер еліміздің саяси және құқықтық жүйесін жаңғыртуға берік негіз қалады. Олар экономиканы дамытуға, азаматтардың құқықтарын қорғауға, мемлекеттік басқарудың ашықтығы мен тиімділігін арттыруға бағытталды. Осы тұрғыдан алғанда, бүгінгі бірлескен отырыс өткен кезеңге қорытынды жасап қана қоймай, алдағы реформалардың жаңа бағытын айқындаған маңызды саяси оқиға болды.
Қазақстан енді мемлекеттік дамудың жаңа кезеңіне қадам басып отыр. Бұл кезеңнің басты мақсаты – заң үстемдігін нығайту, қоғамдық келісімді сақтау, тиімді мемлекеттік басқаруды қамтамасыз ету және азаматтардың әл-ауқатын арттыру. Сондықтан бүгінгі тарихи жиын елдің өткен жолын бағамдап, болашаққа жаңа бағдар берген тағылымды сәт ретінде тәуелсіз Қазақстанның саяси шежіресінде ерекше орын алады.
Қамбар ИСЛАТ,
Қамысқалалық шаруагер
