Тұрмыстық зорлық-зомбылық – қазіргі қоғамдағы ең өзекті әрі ауыр мәселелердің бірі. Бұл тек бір отбасының ішкі мәселесі емес, тұтас қоғамның болашағына әсер ететін әлеуметтік проблема. Зорлық-зомбылық физикалық күш көрсетумен ғана шектелмейді. Оның психологиялық, экономикалық және моральдық түрлері де бар. Осындай қысымға ұшыраған адам уақыт өте келе өзіне деген сенімін жоғалтып, өмірден түңілуі мүмкін.
Өкінішке қарай, көптеген адамдар тұрмыстық зорлық-зомбылықты «отбасылық мәселе» деп қабылдап, оған араласпауға тырысады. Бірақ үнсіз қалу – мәселені одан әрі ушықтыра түседі. Әсіресе әйелдер мен балалар жиі жәбір көреді. Кейбірі қорқыныштан немесе қоғамның сынынан именіп, көмек сұрай алмайды. Бұл жағдай олардың психологиялық жағдайына ғана емес, болашақ өміріне де үлкен зиян келтіреді.
Тұрмыстық зорлық-зомбылықтың басты себептерінің бірі – тәрбиенің әлсіздігі, ашуды басқара алмау, ішімдікке тәуелділік және құқықтық сауаттың төмендігі. Кейбір адамдар күш көрсетуді қалыпты жағдай деп есептейді. Алайда қандай жағдайда болмасын адамға қол көтеру – адамгершілікке де, заңға да қайшы әрекет.
Бұл мәселені шешу үшін қоғам болып күресуіміз қажет. Ең алдымен, отбасындағы сыйластық пен түсіністікті нығайту керек. Мектептерде жастарға отбасы құндылықтары мен адам құқығы туралы көбірек түсіндірілуі тиіс. Сонымен қатар, зорлық көрген адамдарға психологиялық және құқықтық көмек қолжетімді болуы қажет. Заңның қатаң орындалуы да өте маңызды.
Менің ойымша, мықты қоғам – қауіпсіз отбасыдан басталады. Егер әр отбасыда сыйластық пен мейірім болса, еліміздің болашағы да жарқын болады. Сондықтан тұрмыстық зорлық-зомбылыққа бейжай қарамай, оған қарсы бірге күресу – әр азаматтың міндеті.
Әсет КЕНЖЕҒАЛИЕВ,
Жас кәсіпкер
