Қазіргі қоғамда еңбек адамына деген құрметті арттыру және еңбек құндылығын жастардың санасына сіңіру ерекше маңызға ие. Мемлекет басшысы атап өткендей, елдің өркендеуі мен экономиканың дамуы ең алдымен адал еңбектің арқасында жүзеге асады. Сондықтан еңбекқорлық, жауапкершілік және кәсіби шеберлік әрбір азаматтың басты қасиетіне айналуы тиіс.
Бұл тұрғыдан алғанда жеңіл өнеркәсіп саласының орны ерекше. Себебі халықтың күнделікті тұтынатын көптеген тауарлары осы саланың мамандарының еңбегі арқылы өндіріледі. Киім-кешек тігу, ұлттық нақыштағы бұйымдар жасау, арнайы киімдер дайындау – мұның бәрі үлкен шеберлікті, табандылықты және шығармашылықты талап етеді. Жеңіл өнеркәсіп қызметкерлерінің еңбегі ел экономикасының дамуына ғана емес, ұлттық мәдениеттің сақталуына да өз үлесін қосады.
Ткаченко еңбек әулетінің тарихы – еңбектің қадірін көрсететін жарқын мысалдардың бірі. Бір отбасының бірнеше ұрпағының бір салада еңбек етіп, кәсіби дәстүрді жалғастыруы үлкен құрметке лайық. Әулеттің жалпы еңбек өтілінің 200 жылдан асуы олардың мамандыққа деген адалдығын, жауапкершілігін және еңбекке деген сүйіспеншілігін айқын көрсетеді. Осындай еңбек әулеттері қоғамда кәсібиліктің, тұрақтылықтың және ұрпақтар сабақтастығының символына айналады.
Әсіресе Андрей Иванович Ткаченконың қызмет жолы ерекше назар аудартады. Ол өз кәсібін тек табыс көзі ретінде ғана емес, шығармашылық пен елге қызмет етудің құралы ретінде қарастырған. Оның жетекшілігімен дайындалған мемлекеттік рәміздер, жауынгерлік тулар мен ресми киімдер ел тарихының маңызды бөлігіне айналды. Бұл – еңбек адамының қоғамдағы рөлінің қаншалықты маңызды екенін дәлелдейді.
Менің ойымша, бүгінгі жастар дәл осындай еңбекқор жандардан үлгі алуы керек. Қандай мамандық иесі болса да, адам өз ісін сапалы әрі жауапкершілікпен атқарса, ол қоғамға пайда әкеледі. Еңбекке деген құрмет отбасынан басталып, білім беру ұйымдары мен қоғам тарапынан қолдау табуы қажет. Сонда ғана біз кәсіби біліктілігі жоғары, еңбекқор әрі отаншыл ұрпақ тәрбиелей аламыз.
Қорытындылай келе, еңбек адамына құрмет көрсету – өркениетті қоғамның басты белгісі. Ал еңбек әулеттері ұрпақтар сабақтастығын сақтап, жастарға үлгі болатын құндылықтардың жарқын көрінісі болып табылады. Сондықтан олардың еңбегін насихаттау және бағалау әрқашан маңызды болып қала береді.
Жоламан ДӘУЛЕТИЯР
