«Таза Қазақстан» – қоршаған ортаны тазалаумен ғана шектелмейтін, адамның қоғам алдындағы жауапкершілігін қалыптастыратын маңызды бастама. Менің ойымша, тазалық ең алдымен әр адамның өз ауласынан, үйінің айналасынан және күнделікті әрекетінен басталуы керек. Біреулер тазалықты арнайы қызметтердің міндеті деп қабылдайды. Алайда ортақ ортаны таза ұстау – баршамызға ортақ іс.
Ауладағы қоқысты белгіленген орынға тастау, ағаштарды сындырмау, қоғамдық орындарды бүлдірмеу сияқты қарапайым әрекеттердің өзі үлкен мәдениетті көрсетеді. Егер әр азамат өзіне тиесілі аумаққа ұқыпты қараса, қаланың да, ауылдың да көркі өзгереді. Сондықтан «Таза Қазақстан» ұғымын бір реттік сенбілік емес, күнделікті өмір салтына айналдыру қажет деп есептеймін.
