Адамның өмір сапасына оның үйі ғана емес, айналасындағы қоғамдық кеңістіктің жағдайы да әсер етеді. Аула, саябақ, көше, балалар алаңы, демалыс орындары – барлығы тұрғындарға ортақ мекен. Сондықтан «Таза Қазақстан» тұжырымдамасын жүзеге асыруда қоғамдық кеңістіктерді таза ұстау мен абаттандырудың маңызы ерекше.
Таза әрі көрікті орта адамдардың сол мекенге деген жауапкершілігін арттырады. Мысалы, абаттандырылған аулаға тұрғындардың өздері де ұқыпты қарауға тырысады. Ал ағаштар отырғызылып, гүлдер егілген жерде табиғатты қорғауға деген қызығушылық та қалыптасады. Бұл жерде тазалық пен көркейту қатар жүруі керек. Бір жерді қоқыстан тазалау жеткіліксіз, оны кейінгі уақытта да таза күйінде сақтау маңызды.
«Таза Қазақстан» аясындағы жұмыстар әртүрлі буын өкілдерін біріктіруімен де құнды. Үлкендер жастарға үлгі көрсетсе, жастар жаңа бастамалар мен идеялар ұсына алады. Мектеп оқушылары, студенттер, еңбек ұжымдары, еріктілер мен тұрғындар бірлесіп әрекет еткен кезде қоғамдағы өзара жауапкершілік сезімі күшейеді.
Сондықтан таза қала дегеніміз – тек қоқысы жоқ қала емес. Таза қала – тұрғындары қоғамдық мүлікке құрметпен қарайтын, табиғатты қорғайтын, өз ауласы мен көшесіне бейжай қарамайтын орта. Осындай мәдениет қалыптасқанда ғана елді мекеннің сыртқы көрінісімен қатар, қоғамның ішкі мәдениеті де өзгереді.
М.ЖАРБОСИНОВА
