«Таза Қазақстан» идеясын жүзеге асыру тек мемлекеттік мекемелердің немесе коммуналдық қызметтердің міндеті деп қабылдау дұрыс емес. Қоғамдық ортаның қандай болуы әр азаматтың әрекетіне байланысты.
Мемлекет қажетті жағдай жасап, инфрақұрылымды дамытқанымен, оны таза сақтау — тұрғындардың ортақ жауапкершілігі. Мысалы, бір адамның қоқысты арнайы жәшікке тастауы, ауласын таза ұстауы немесе ағашқа зиян келтірмеуі қарапайым әрекет болып көрінуі мүмкін. Бірақ осындай әрекеттер мыңдаған адам тарапынан қайталанса, ол қоғамдық мәдениетке айналады.
Сондықтан «Таза Қазақстан» тұжырымдамасының мәнін тек тазалық жұмыстарынан емес, адамдардың бір-біріне және ортақ мекеніне деген құрметінен іздеу қажет. Таза қала — жай ғана көрікті қала емес, онда өмір сүретін азаматтардың жауапкершілігі мен мәдениетінің көрінісі.
С.ҚАЙЫР
