«Таза Қазақстан» бастамасының маңызды ерекшелігі – ол азаматтарды ортақ іске жұмылдырып, қоғамдағы жауапкершілік сезімін күшейтуге мүмкіндік береді. Себебі қоршаған ортаның жағдайы бір ғана адамның немесе бір ғана мекеменің мәселесі емес. Табиғат пен қоғамдық кеңістік баршаға ортақ болғандықтан, оны қорғау да ортақ міндет болуы керек.
Қазіргі уақытта қалалар мен ауылдардың тазалығы, көгалдандыру, аулаларды абаттандыру, су көздерін қорғау сияқты мәселелер қоғамның белсенді қатысуын қажет етеді. Мемлекеттік органдар тиісті жұмыстарды атқарғанымен, азаматтардың немқұрайдылығы болса, тұрақты нәтиже қалыптастыру қиын. Сондықтан «Таза Қазақстан» әр адамға «Мен бұл өзгеріске қандай үлес қоса аламын?» деген сұрақ қоюға мүмкіндік береді.
Меніңше, азаматтық белсенділік тек үлкен қоғамдық жобаларға қатысумен өлшенбейді. Көршілермен бірге ауланы тазалау, ағаш отырғызу, қоқысты сұрыптауға дағдылану, қоғамдық орындарды таза ұстау сияқты қарапайым істердің өзі азаматтық жауапкершіліктің нақты көрінісі.
Әсіресе жастардың белсенділігі маңызды. Жастар табиғатты қорғау мәдениетін заманауи технологиялармен және жаңа идеялармен ұштастыра алады. Әлеуметтік желілер арқылы экологиялық мәдениетті насихаттау, сенбіліктер ұйымдастыру, ағаш отырғызу бастамаларын қолдау – қоғамға оң әсер ететін әрекеттер.
«Таза Қазақстан» адамдардың бір-біріне деген қарым-қатынасына да ықпал етеді. Ортақ аумақты бірге тазалау барысында адамдар танысып, көршілік байланыстар нығаяды. Яғни тазалық жұмысы әлеуметтік байланысты күшейтетін ортақ іске айналады.
Біздің қоғамда «Біреу тазалайды» деген түсініктің орнына «Бұл – біздің ортақ ортамыз» деген ұстаным қалыптасуы маңызды. Сонда азамат өз ауласына, көшесіне немесе қаласына сырттай бақылаушы ретінде емес, сол ортаның жауапты мүшесі ретінде қарайды.
Мен үшін «Таза Қазақстанның» басты мағынасы – таза елді тек күту емес, оны өз қолыңмен қалыптастыру. Азаматтың кішкентай еңбегі көпшілікпен бірігіп, үлкен қоғамдық нәтижеге айналады. Сондықтан тазалық – тек санитарлық талап емес, азаматтық жауапкершіліктің нақты көрінісі.
Ж.СЕМБИЕВА
