Қазіргі таңда экологиялық мәселелер бүкіл әлем үшін маңызды мәселелердің біріне айналып отыр. Табиғи ресурстарды ұқыпты пайдалану, қоршаған ортаны қорғау және елді мекендердің тазалығын сақтау – әр мемлекеттің алдында тұрған ортақ міндет. Осы бағытта жүзеге асырылып жатқан «Таза Қазақстан» жалпыұлттық тұжырымдамасы еліміздің болашағы үшін маңызды деп ойлаймын.
Біз табиғатты бүгін ғана емес, келешек ұрпақ үшін де қорғауымыз керек. Қазіргі таңда қоршаған ортаға немқұрайлы қарау болашақта үлкен мәселелерге әкелуі мүмкін. Сондықтан табиғатты аялау, жасыл желекті көбейту, қоқыс мәселесін реттеу және елді мекендерді таза ұстау – әр азаматтың ортақ міндеті.
«Таза Қазақстан» тұжырымдамасының ерекшелігі – оның қоғамды нақты әрекетке шақыруында. Адамдардың сенбіліктерге қатысуы, ағаш отырғызуы, қоғамдық орындарды тазалауы арқылы экологиялық жауапкершілік қалыптасады. Бірақ мұндай жұмыстар белгілі бір күнмен немесе акциямен ғана шектелмеуі тиіс. Тазалықты сақтау адамның тұрақты өмір салтына айналғаны жөн.
Менің пікірімше, бұл бастаманың ең маңызды нәтижелерінің бірі – адамдардың ойлау мәдениетінің өзгеруі. Қоршаған ортаны қорғау тек арнайы мамандардың немесе мемлекеттік мекемелердің міндеті емес екенін әр азамат түсінуі қажет. Табиғатты қорғауға қосылған кішкентай үлестің өзі жалпы қоғам үшін үлкен нәтижеге айналуы мүмкін.
Болашақ Қазақстанның қандай болатыны бүгінгі біздің әрекетімізге байланысты. Егер біз табиғатты қорғап, қалаларымыз бен ауылдарымызды таза ұстасақ, келесі ұрпаққа жайлы әрі көрікті ел қалдырамыз. Сондықтан «Таза Қазақстан» – бүгінгі күннің ғана емес, ертеңгі күннің де мәселесін шешуге бағытталған маңызды бастама.
Қорытындысында айтарым, таза ел құру үлкен өзгерістерден емес, әр адамның өзінен басталады. Өз ауламызды таза ұстау, қоқысты жерге тастамау, табиғатты аялау сияқты қарапайым әрекеттер арқылы біз еліміздің болашағына үлес қоса аламыз. Таза Қазақстан – баршаға ортақ мақсат және келешек ұрпаққа қалдыратын құнды аманат.
Б.АХМЕТОВА
