Меніңше, «Таза Қазақстан» жалпыұлттық тұжырымдамасының ерекшелігі — оның бүкіл қоғамды ортақ іске жұмылдыра алуында. Қаланың немесе ауылдың тазалығы тек коммуналдық қызметтердің жұмысына байланысты емес. Мемлекеттік мекемелер, кәсіпкерлер, қоғамдық ұйымдар, жастар және қарапайым тұрғындар бір мақсатқа бірігіп әрекет еткенде ғана нақты нәтиже қалыптасады.
Кейде адамдар тазалықты «біреудің жұмысы» деп қабылдайды. Алайда қоғамдық кеңістіктердің жағдайы сол жерде өмір сүретін адамдардың жауапкершілігіне де байланысты. Мысалы, аулаға отырғызылған көшетті күтіп-баптау, қоқыс жәшігін дұрыс пайдалану, подъезд бен ауланы таза сақтау — үлкен қаражатты немесе ерекше мүмкіндікті қажет етпейтін қарапайым әрекеттер. Осындай шағын істердің өзі қоғамдағы тәртіп пен өзара сыйластықты қалыптастырады.
Сонымен бірге бұл бастама азаматтардың туған жерге деген жанашырлығын арттыруға мүмкіндік береді. Адам өзі тазалаған аумаққа, өзі отырғызған ағашқа немесе өзі көркейтуге үлес қосқан көшеге басқаша қарайды. Өйткені ол жерде өзінің еңбегі бар екенін сезінеді. Бұл — қоғамдық жауапкершіліктің қалыптасуына ықпал ететін маңызды фактор.
Сондықтан «Таза Қазақстанды» тек тазалық жұмыстарының жиынтығы емес, адамдарды біріктіретін қоғамдық мәдениет ретінде қарастырған дұрыс. Әр азамат «менен не өзгереді?» деп емес, «мен өзім не істей аламын?» деп ойласа, елді мекендердің көркеюіне үлкен үлес қосылады.
С. САЙЛАУБАЙ
