Туған жерді сүю – оның табиғатын қорғаудан басталады. «Таза Қазақстан» жалпыұлттық акциясы әр азаматқа туған өлкесінің тазалығы мен көркеюіне үлес қосуға мүмкіндік береді. Бұл бастама қоғамдағы бірлік пен ынтымақтастықты нығайтып, адамдардың ортақ іске жұмыла білуінің жарқын үлгісіне айналды.
Әдемі әрі таза қала немесе ауыл – сол жерде тұратын тұрғындардың мәдениеті мен жауапкершілігінің көрінісі. Қоқысты арнайы орындарға тастау, ағаш отырғызу, саябақтарды күтіп ұстау, су көздерін қорғау – мұның барлығы туған жерге деген құрметтің белгісі. Осындай қарапайым әрекеттердің өзі қоршаған ортаның жақсаруына зор әсер етеді.
«Таза Қазақстан» акциясына жастардың белсенді қатысуы ерекше маңызды. Себебі табиғатты қорғау мәдениеті жас ұрпақтың бойында қалыптасса, болашақта экологиялық мәселелердің алдын алу жеңілдейді. Әрбір азамат өз ісімен үлгі көрсетіп, табиғатты аялауды өмірлік ұстанымына айналдырса, еліміздің әр өңірі таза, көркем әрі жайлы мекенге айналары сөзсіз. Туған жердің тазалығы – елге деген сүйіспеншіліктің, азаматтық жауапкершіліктің және болашаққа деген қамқорлықтың нақты көрінісі.
Ж.СЕМБИЕВА
