Бүгін елордада өткен Парламент палаталарының бірлескен отырысы Қазақстанның саяси-құқықтық дамуындағы ерекше маңызға ие тарихи жиын ретінде есте қалды. Мемлекет басшысы Қасым-Жомарт Тоқаев VIII сайланған Парламенттің төртінші сессиясын қорытындылап қана қоймай, еліміздің соңғы жылдардағы ауқымды реформаларына жан-жақты баға берді. Президенттің айтуынша, қазіргі Парламент құрамы тәуелсіз Қазақстан тарихындағы ең нәтижелі әрі жауапты шақырылымдардың бірі болды.
Соңғы үш жыл ішінде қабылданған 300-ден астам заң, оның ішінде жаңа Конституцияны іске асыруға бағытталған конституциялық заңдар, кодекстер мен маңызды нормативтік актілер еліміздің құқықтық жүйесін жаңа деңгейге көтерді. Бұл құжаттар мемлекеттік басқару моделін жаңғыртып, билік тармақтарының тепе-теңдігін нығайтуға, азаматтардың құқықтары мен бостандықтарын қорғауға, қоғамдық институттардың қызметін жетілдіруге бағытталды.
Президент өз сөзінде реформалардың оңай жүзеге аспағанын, алайда Парламент депутаттарының ел мүддесін бәрінен жоғары қойып, жауапты кезеңде табанды еңбек еткенін ерекше атап өтті. Бұл – саяси жаңғыру жолындағы жүйелі жұмыстың нақты нәтижесі.
Бүгінгі бірлескен отырыс бір парламенттік кезеңнің қорытындысын шығарып қана қойған жоқ. Ол жаңа саяси кезеңге өту алдындағы маңызды тарихи межені айқындады. Биылғы 1 қыркүйектен бастап өз жұмысын бастайтын жаңа Парламент – Құрылтай елдегі реформалардың жалғасын қамтамасыз етіп, заң шығару қызметін жаңа форматта жалғастырады.
Мемлекет басшысының «заман жаңашыл әрі батыл қадамдарды талап етеді» деген сөзі алдағы кезеңнің басты бағдары екенін аңғартады. Бұл жаңа мемлекеттік институттардың алдында үлкен жауапкершілік тұрғанын, қоғам сұранысына сай тиімді заңдар қабылдау, экономикалық өсім мен әлеуметтік әділеттілікті қамтамасыз ету бағытындағы жұмыстардың жалғасатынын білдіреді.
Осылайша, бүгінгі отырыс Қазақстанның жаңару жолындағы маңызды кезеңді қорытындылаған, өткенге баға беріп, болашаққа бағдар айқындаған тарихи саяси оқиға ретінде ел шежіресінде өз орнын алды.
Самат ҚАБДЕЛОВ,
Исатай ауданының Құрметті азаматы, аудандық Қоғамдық кеңестің мүшесі
