Заң мен тәртіп – мемлекеттің тұрақты дамуы мен қоғамдағы өзара сенімнің маңызды негіздерінің бірі. Заң адамдардың құқықтары мен міндеттерін айқындап қана қоймай, әр азаматтың қоғам алдындағы жауапкершілігін де белгілейді. Сондықтан заңды сақтау тек жазадан қорқу арқылы емес, оның қоғам үшін маңызын түсінуден басталуы қажет.
Кейде тәртіпті үлкен мәселелермен ғана байланыстырамыз. Алайда заң мен тәртіп күнделікті өмірдегі қарапайым әрекеттерден көрінеді. Қоғамдық орында белгіленген ережені сақтау, өзгенің құқығына құрметпен қарау, жол қозғалысы талаптарын орындау, қоғамдық мүлікке ұқыпты болу – мұның барлығы құқықтық мәдениеттің көрінісі. Бір қарағанда қарапайым болып көрінетін осы әрекеттер қоғамдағы тәртіптің қалыптасуына тікелей әсер етеді.
Менің ойымша, заңды құрметтейтін қоғамда адамдар өз құқықтарын ғана емес, өз міндеттерін де жақсы түсінуі керек. Әр азамат «маған не берілді?» деген сұрақпен қатар, «мен қоғамға қандай жауапкершілікпен қараймын?» деген сұрақты да қоя білуі қажет. Өйткені заң үстемдігі мемлекеттік органдардың ғана міндеті емес, бүкіл қоғамның ортақ мәдениеті.
Заңға құрмет отбасынан, мектептен және күнделікті тәрбиеден қалыптасады. Бала үлкендердің заңды сақтайтынын көріп өссе, тәртіпті табиғи құндылық ретінде қабылдайды. Сондықтан құқықтық мәдениетті қалыптастыру – бүгінгі күннің ғана емес, болашақтың да маңызды міндеті.
Т.КЕНЖЕҒАЛИЕВА
