Ата Заң – азаматтардың құқықтары мен бостандықтарын айқындап, оларды заң жүзінде бекітетін негізгі құжат. Ол құқықтардың сақталуына кепілдік беріп қана қоймай, мемлекеттің бірлігі мен тұрақты дамуының негізін қалайды. Осындай маңызды құқықтық тұғыр – Конституция 15 наурызда өтетін республикалық референдумда халықтың таңдауымен қабылданбақ.
Қолданыстағы Конститу-цияның 27-бабында неке мен отбасы, әке мен ана және бала мемлекеттің қорғауында екені нақты көрсетілген. Сондай-ақ бала тәрбиелеу – ата-ананың әрі құқығы, әрі міндеті екені және кәмелетке толған, еңбекке жарамды балалардың еңбекке жарамсыз ата-анасына қамқорлық жасауға міндеттілігі айқындалған. Бұл норма ұрпақтар сабақтастығын сақтауға негізделген дәстүрлі құндылықтармен үндеседі.
Ал Жаңа Конституция жобасының 30-бабында неке ер мен әйелдің тең құқықты әрі ерікті одағы ретінде нақтыланған. Бұл тұжырым отбасы институтының құқықтық негізін айқындап, қоғамдағы рухани тұрақтылықты нығайтуға бағытталған. Отбасы – мемлекеттің іргетасы. Сондықтан жаңа Конституцияда отбасы институтына басымдық берілуі – ел болашағына деген жауапкершіліктің көрінісі.Себебі ұлттың сапасы отбасының сапасынан басталады. Ал отбасы берік болса, мемлекет те мығым болады.
Нұрия ҚАЙДАР,
Аққыстау орта мектебі құқық негіздері пәнінің мұғалімі
