Менің көзқарасымша, жаңа Конституция жер қатынастарын реттеудегі тарихи әділдікті қалпына келтірудің маңызды нышаны іспетті. Себебі жер – кез келген мемлекеттің экономикалық, әлеуметтік және саяси тірегі. Қазақ халқы үшін жер ұғымы тек аумақтық кеңістік қана емес, ол – ата-бабадан қалған аманат, ұлттық бірегейліктің негізі, ел тәуелсіздігінің басты белгісі. Сондықтан жер мәселесінің Конституция деңгейінде нақты әрі әділ айқындалуы – уақыт талабынан туындаған шешім деп есептеймін.
Жер қойнауының байлығы халықтың ортақ қазынасы ретінде бекітілуі мемлекеттің егемендігін жаңа деңгейге көтереді. Бұл норма табиғи ресурстардың жекелеген топтардың емес, бүкіл халықтың игілігі екенін айқындайды. Мұндай ұстаным әлеуметтік әділдікті нығайтып қана қоймай, ұлттық байлықты басқаруда ашықтық пен жауапкершілікті арттырады. Сонымен қатар, бұл қадам ұлттық мүддені қорғаудың берік құқықтық негізін қалыптастырып отыр деп түсінемін. Табиғи ресурстарға қатысты шешімдер енді ең алдымен елдің ұзақ мерзімді дамуына, халықтың әл-ауқатына бағытталуы тиіс.
Экологиялық мәселелер мен ресурстарды тиімді пайдалану мәселесінің де назардан тыс қалмағаны қуантады. Қазіргі жаһандану дәуірінде табиғи тепе-теңдіктің бұзылуы, климаттың өзгеруі, су мен жер ресурстарының сарқылуы секілді өзекті проблемалар бүкіл әлемді алаңдатуда. Осындай жағдайда жаңа Конституцияда табиғи ортаны қорғау қағидаттарының көрініс табуы – стратегиялық маңызы зор шешім. Бұл мемлекетке экологиялық қауіпсіздікті қамтамасыз етуге, өндіріс пен табиғат арасындағы тепе-теңдікті сақтауға, табиғи байлықты ұтымды әрі жауапты игеруге құқықтық мүмкіндік береді.
Сонымен бірге, табиғи ресурстарды ұқыпты пайдалану қағидаты келешек ұрпақ алдындағы жауапкершілікті де айқындайды. Жер мен жер қойнауының байлығы тек бүгінгі күннің қажетіне жұмсалатын құрал емес, ол – болашақтың да тірегі. Сондықтан жаңа конституциялық нормалар табиғи байлықты сақтап, оны ұрпақтан-ұрпаққа жеткізуге бағытталған ұзақ мерзімді саясаттың негізін қалайды. Бұл – тұрақты даму қағидаттарына сай келетін маңызды қадам.
Қорытындылай келе, жаңа Конституция жер қатынастарын әділ әрі ашық реттеуге, ұлттық байлықты қорғауға және экологиялық жауапкершілікті арттыруға бағытталған тарихи құжат деп санаймын. Ол мемлекеттің егемендігін нығайтып қана қоймай, табиғи ресурстарды халық игілігіне тиімді пайдаланудың берік құқықтық іргетасын қалыптастырады. Осындай өзгерістер еліміздің тұрақты дамуына, әлеуметтік әділдікке және болашақ ұрпақтың жарқын келешегіне қызмет ететініне сенімім мол.
Айгүл АДИЛОВА,
Зинеден ауылдық округінің әкімі
