Сыбайлас жемқорлық – кез келген мемлекеттің дамуына кедергі келтіретін, қоғамның әділдік қағидаттарына нұқсан келтіретін қауіпті әлеуметтік құбылыс. Ол экономикалық өсімге ғана емес, халықтың мемлекетке деген сеніміне де кері әсер етеді. Сондықтан сыбайлас жемқорлықпен күрес – мемлекеттік саясаттың маңызды бағыттарының бірі.
Бүгінде елімізде бұл бағытта жүйелі жұмыстар жүргізіліп келеді. Қазақстан Республикасы Сыбайлас жемқорлыққа қарсы іс-қимыл агенттігі мемлекеттік органдар қызметінің ашықтығын арттыру, алдын алу шараларын күшейту және қоғамда сыбайлас жемқорлыққа мүлдем төзбеушілік мәдениетін қалыптастыру мақсатында түрлі кешенді іс-шараларды жүзеге асырып отыр. Бұл – әділетті қоғам құру жолындағы маңызды қадамдардың бірі. Аудандық санитариялық-эпидемиологиялық бақылау басқармасы да өз қызметінде адалдық қағидаттарын басты назарда ұстайды. Басқармада мемлекеттік қызметшілердің әдеп нормаларын сақтауына, қызметтік міндеттерін жауапкершілікпен әрі сапалы орындауына ерекше мән беріледі. Азаматтармен ашық әрі әділ қарым-қатынас орнату – ұжым жұмысының негізгі қағидаттарының бірі. Санитариялық-эпидемиологиялық бақылау саласы халық денсаулығын қорғауда айрықша маңызға ие. Осыған байланысты басқарма мамандары өз құзыреті аясында заң талаптарын қатаң сақтап, мемлекеттік қызмет көрсету барысында ашықтық пен жариялылық принциптерін басшылыққа алады. Қызметтердің электронды форматта көрсетілуі мен рәсімдердің цифрландырылуы жемқорлық тәуекелдерін төмендетуге мүмкіндік беріп отыр.
Сонымен қатар басқарма ұжымында сыбайлас жемқорлыққа қарсы заңнамаларды түсіндіру бағытында тұрақты түрде құқықтық жұмыстар жүргізіледі. Әрбір қызметкер адалдық, әділдік және жауапкершілік қағидаттарын ұстанып, қоғам сенімін ақтауға ұмтылады. Жалпы, сыбайлас жемқорлықпен күрес – тек мемлекеттік органдардың ғана емес, бүкіл қоғамның ортақ міндеті. Әрбір азамат заң бұзушылыққа төзбеушілік танытып, парақорлыққа қарсы белсенді ұстанымда болғанда ғана әділетті әрі ашық қоғам қалыптастыруға болады. Қорыта айтқанда, сыбайлас жемқорлықтың алдын алу – тұрақты әрі жүйелі жұмысты талап ететін маңызды бағыт. Ашықтық пен заңдылықты, адалдық пен жауапкершілікті басты қағидат еткен қоғам ғана мемлекет дамуының берік іргетасын қалыптастыра алады.
Ардақ НҰРАЛИЕВА,
аудандық санитариялық-эпидемиологиялық бақылау басқармасының бас маманы
