Қоршаған ортаның тазалығы – тұрғындардың қауіпсіздігі мен санитарлық жағдайының маңызды көрсеткіші. Осы бағыттағы жұмыстар Исатай ауданына қарасты Қамысқала ауылдық округінде де жүйелі түрде жүргізілуде.
«Таза Қазақстан» жобасы аясында ауылдық округ аумағындағы тұрмыстық қалдықтар жиналатын полигонда арнайы ауыр техника – бульдозердің көмегімен тазалық және ретке келтіру жұмыстары атқарылуда. Үйілген қалдықтар арнайы техникамен тегістеліп, тығыздалып, үстіңгі бөлігі топырақпен жабылуда.
Бұл – сырт көзге қарапайым көрінгенімен, қоршаған ортаға әсерді азайтуға бағытталған маңызды жұмыс. Қалдықтардың ашық жатуы желмен ұшып, айналаға таралуына, жауын-шашын әсерінен ластаушы заттардың топыраққа сіңуіне және аумақтың санитарлық жағдайының нашарлауына әкелуі мүмкін. Сондықтан қалдықтарды ретке келтіріп, топырақпен оқшаулау – полигон аумағын қауіпсіз ұстаудың негізгі шараларының бірі. Қазақстандағы санитариялық талаптарда да қалдықтарды тығыздау және топырақпен оқшаулау қарастырылған.
Қазіргі таңда полигон аумағында ғана емес, оның айналасындағы қауіпті шұңқырлар мен ойпаттарды да ретке келтіру жұмыстары жүргізілуде. Аталған аумақтар техникалық талаптарға сәйкес топырақпен толтырылып, нығыздалып, бекітіліп жатыр. Мұндағы басты мақсат – жер бедерін қауіпсіз қалыпқа келтіріп, адамдар мен техниканың қозғалысына қауіп төндіретін учаскелерді азайту.
Ауыл әкімдігінің мәліметінше, атқарылып жатқан шаралар қоршаған ортаға зиянды заттардың таралуын барынша шектеуге, қалдықтардың желмен жан-жаққа шашылуын азайтуға және аумақты алдағы уақытта қауіпсіз пайдалануға мүмкіндік береді.
Жұмыстың тағы бір маңызды бағыты – полигон аумағын жүйелі түрде бақылауда ұстау. Қалдықтарды жай ғана жинап қоюмен мәселе шешілмейді. Оларды тығыздау, оқшаулау, аумақты жоспарлау және қажет болған жағдайда рекультивациялық шаралар жүргізу қоршаған ортаға түсетін салмақты азайтуға мүмкіндік береді. Қалдықтарды көму орындарын қалпына келтіру кезінде техникалық және биологиялық рекультивациялау тәсілдері де қолданылады.
«Таза Қазақстан» бастамасының түпкі мақсаты да – тазалықты бір реттік науқан деңгейінде қалдырмай, елді мекендердің экологиялық жағдайын тұрақты жақсарту. Ресми мәліметтерде заңсыз қоқыс орындарын жою, қалдықтарды басқару инфрақұрылымын дамыту және полигондарды ретке келтіру осы бағыттағы негізгі жұмыстардың бірі ретінде көрсетіледі.
Қамысқаладағы атқарылып жатқан жұмыс – ауыл аумағын тазалаумен ғана шектелмейтін, қауіпсіз әрі қолайлы орта қалыптастыруға бағытталған нақты қадам. Ең бастысы, мұндай жұмыстың нәтижесін сақтау тек арнайы техниканың немесе ауыл әкімдігінің міндеті емес. Қоршаған ортаның тазалығы әр тұрғынның жауапкершілігінен басталады.
Әсел ТАБИҒАТОВА
