Қазіргі қоғамның көкейкесті мәселелерінің бірі – сыбайлас жемқорлықпен күрес. Бұл – тек құқық бұзушылық емес, мемлекеттің дамуына тұсау салып, ел ертеңіне көлеңке түсіретін қауіпті құбылыс. Жемқорлық жайлаған жерде әділдік әлсіреп, халықтың билікке деген сенімі шайқалады, ал сенім әлсіреген жерде тұрақты даму туралы айту қиын. Сондықтан оған қарсы ымырасыз көзқарас қалыптастыру – уақыт талабы, ал оның алдын алу – әрбір мемлекеттік органның басты міндеті.
Осы бағытта Атырау облысы бойынша қазынашылық департаментінің Исатай аудандық қазынашылық басқармасы өз қызметін заңдылық, ашықтық және адалдық қағидаттарына сүйене отырып, жүзеге асырып келеді. Қазынашылық саласы – мемлекеттік қаржының әр теңгесінің мақсатты әрі тиімді жұмсалуына жауапты стратегиялық маңызы бар жүйе. Ел қазынасы – халықтың несібесі, бюджет қаражаты – мемлекеттің әлеуметтік-экономикалық дамуының тірегі. Сондықтан бұл саладағы тәртіп пен тазалық – тек кәсіби талап емес, мемлекеттік мүдденің өзегі.
Басқармада сыбайлас жемқорлық тәуекелдерінің алдын алу мақсатында кешенді жұмыстар жүргізіледі. Қызметкерлер арасында құқықтық оқыту, түсіндіру семинарлары, ішкі талқылаулар ұйымдастырылып, қолданыстағы заңнама талаптары жүйелі түрде зерделенеді. Әдеп кодексін сақтау, қызметтік тәртіпті нығайту, мүдделер қақтығысының алдын алу мәселелері тұрақты бақылауда. Әрбір қызметкер мемлекеттік қызмет – жай ғана жұмыс емес, ел алдындағы аманат екенін терең түсінеді.
Сонымен қатар, ішкі бақылау тетіктерін жетілдіру, қаржылық операциялардың ашықтығын қамтамасыз ету, құжат айналымының айқындығын арттыру бағытында нақты шаралар қабылданған. Электронды жүйелерді пайдалану, цифрлық форматтағы есептілік пен бақылау құралдары адами факторды азайтып, процестердің ашықтығын күшейтеді. Бұл өз кезегінде сыбайлас жемқорлық тәуекелдерін төмендетуге мүмкіндік береді.
Басқармада «нөлдік төзімділік» қағидаты берік ұстанымға айналған. Кез келген құқық бұзушылыққа немқұрайлы қарауға жол берілмейді. Ұжымда адалдық, әділдік, жауапкершілік секілді құндылықтар күнделікті қызметтің негізіне айналған. Өйткені сыбайлас жемқорлыққа қарсы мәдениет – тек заң талаптарын орындау емес, ол – әр адамның ішкі ұстанымы мен азаматтық позициясы.
Сондай-ақ қоғаммен кері байланыс орнату, азаматтардың өтініштері мен ұсыныстарына дер кезінде жауап беру де ашықтықты қамтамасыз етудің маңызды бөлігі. Ашық диалог пен айқын есептілік – сенім қалыптастырудың басты алғышарты. Халық сенімі – мемлекеттік қызметтің ең жоғары бағасы.
Қорытындылай келе, сыбайлас жемқорлыққа қарсы іс-қимыл – тұрақты, жүйелі әрі үздіксіз жүргізілуі тиіс үдеріс. Заңдылықты берік сақтап, адалдық пен әділдікті ту еткенде ғана мемлекеттік қызметтің беделі артып, қоғамдағы сенім нығаяды. Ел қазынасына жауапты салада қызмет ету – үлкен абырой әрі зор жауапкершілік. Осы жауапкершілікті сезіне отырып атқарылған әрбір адал іс – жемқорлықсыз, әділетті қоғам құру жолындағы нақты қадам.
Мирас МЫРЗАҒАЛИ,
аудандық мемлекеттік қазынашылық басқармасы басшысының орынбасары
