Жастардың инновациялық ойлау қабілетін дамытуға, стартап мәдениетін қалыптастыруға және өңірдегі өзекті мәселелерге заманауи шешімдер ұсынуға бағытталған «Atyrau Youth Hackathon – 2026» инновациялық жобалар конкурсы басталды. Үш күнге жоспарланған ауқымды іс-шараға 14 пен 35 жас аралығындағы жастар қатысып, «Заң мен тәртіп» қағидаты аясында қоғам үшін маңызды мәселелердің шешімін іздеуге кірісті.
Хакатонның басты ерекшелігі – қатысушылардың дайын жобаны таныстыруымен ғана шектелмей, бірнеше күн бойы өз командаларымен жұмыс істеп, нақты кейстер бойынша идея әзірлеп, оның прототипін жасап, тәжірибелі мамандардың көмегімен жобаларын жетілдіреді. Яғни бұл – жастардың тың ойын ортаға салып қана қоймай, оны нақты іске айналдыруға мүмкіндік беретін алаң.
Биылғы байқауға бас-аяғы 12 команда қатысып жатыр. Үш күн ішінде олар берілген кейстерді жан-жақты талдап, мәселенің түйінін тауып, оны технологиялық тұрғыдан шешудің жолдарын ұсынады.
Іс-шараны ұйымдастырушы Альбина Исатаеваның айтуынша, мұндай хакатон бұған дейін үш рет ұйымдастырылған. Ал биылғы іс-шара алғаш рет жаңа форматта өткізіліп отыр. Оның пікірінше, хакатон – жаңа идеялар туындайтын, жастардың бір-бірімен тәжірибе алмасатын және өзекті мәселелерді бірлесіп шешуге мүмкіндік беретін орта. Байқау барысында қатысушыларға тәжірибелі менторлар мен сарапшылар бағыт-бағдар беріп, жобаларын дамытуға көмектеседі.
Хакатон барысында Атырау облысы полиция департаменті Киберқылмысқа қарсы іс-қимыл басқармасының жедел уәкілі, полиция капитаны Дәурен Мұханбеталиев сөз алып, интернет-алаяқтық мәселесіне тоқталды.
Оның айтуынша, Атырау облысында интернет-алаяқтық фактілері бойынша 520-дан астам қылмыстық іс тіркелген. Оның ішінде 100-ден астам қылмыстық іс сотқа жолданған. Ол қазіргі хакатон аясында интернет-алаяқтықтың алдын алуға бағытталған жаңа жобалардың дүниеге келуіне ерекше үміт артып отырғанын атап өтті.
– Негізінен, Атырау облысында интернет-алаяқтық фактілері бойынша 520-дан астам қылмыстық іс тіркелген болатын. Оның ішінде 100-ден астам қылмыстық іс сотқа жолданды. Қазір интернет-алаяқтық жүйелері өте өршіп бара жатқаны белгілі. Осыған байланысты жастардың түрлі өзгеше бағдарламалар мен сайттар әзірлеуіне мүдделіміз. Егер осындай жобалар жасалса, біз де олармен жұмыс істеуге дайынбыз, — деді полиция капитаны.
Полиция өкілінің айтуынша, жастардың бұл мәселеге белсенді араласуы интернет-алаяқтықтың алдын алуға айтарлықтай септігін тигізуі мүмкін. Әсіресе азаматтарға күмәнді сілтемелерден, жалған қоңыраулардан, интернеттегі түрлі алаяқтық схемалардан сақтануға көмектесетін цифрлық құралдардың пайда болуы маңызды.
Хакатонның менторлары мен спикерлері қатарында IT және бизнес саласында тәжірибесі бар мамандар да бар. Солардың бірі – кәсіпкер, IT әзірлеуші, бизнесті цифрландыру саласының маманы әрі «Atyrau Youth Hackathon 1.0» конкурсының жеңімпазы Алихан Болатов.
Ол қатысушылардың алдында жобаның тек сыртқы көрінісіне немесе қарапайым интерфейсіне сүйеніп қалмай, мәселенің өзін терең түсініп, нақты шешім ұсынудың маңыздылығына тоқталды. Оның айтуынша, хакатондағы жобалар күрделі міндеттерді шешуге бағытталғандықтан, қатысушылар өз идеясының мазмұны мен оны жүзеге асыру жолдарын жан-жақты ойластыруы керек.
Әрине, газет материалына кірістіріп жіберуге болатын қысқа нұсқасы:
Хакатонға үшінші рет қатысып жатқан ЖИ инженері Асылбек Ғизатов биылғы тақырыптың ерекшелігіне тоқталды. Оның айтуынша, бұған дейін медициналық технологиялар бағытында жобалар әзірлеген командасы бұл жолы құқық бұзушылықтардың алдын алуға көмектесетін жасанды интеллект өнімін жасауды көздеп отыр.
– Бірінші кезекте заң саласындағы құрылымдардың жұмысын автоматтандыратын, процестерді оңтайландырып, жеделдетуге көмектесетін ЖИ өнімін әзірлегіміз келеді. Сонымен қатар интернет-алаяқтықтың алдын алуға да жасанды интеллектіні тиімді пайдалануға болады. Әсіресе аға буын өкілдеріне алаяқтарды ажыратуға көмектесетін технологиялық шешімдер қажет деп ойлаймын, — деді Асылбек Ғизатов.
Бүгінгі алғашқы күні әр команда капитаны үш ментормен жеке митап өткізіп, өз жобасының бағытын нақтылайды. Ал екінші күні командалар берілген кейстер бойынша мәселенің шешімін әзірлеп, жобаларын толықтырады. Үшінші күні қатысушылар өз жұмыстарын қазылар алқасының алдында қорғайды. Осыдан кейін жобалар бағаланып, үздік командалар анықталып, жеңімпаздар марапатталады.
Хакатонның «Заң мен тәртіп» қағидаты аясында өтуі де тегін емес. Себебі жастарға ұсынылған үш кейс те қазіргі қоғамдағы өзекті мәселелерді қамтиды.
Бірінші кейс – «Цифрлық қауіпсіздік және интернет-алаяқтықты алдын алу». Бұл бағыт бойынша үздік жоба авторларына 700 мың теңге көлемінде жүлде қарастырылған.
Екінші кейс – «Қауіпсіз қоғам: Буллингсіз орта». Аталған бағытта үздік шешім ұсынған командаға 500 мың теңге беріледі.
Ал үшінші кейс – «Құқықтық мәдениет және заңға бағынатын қоғам». Бұл кейс бойынша жеңімпаз командаға 300 мың теңге көлемінде сыйақы табысталады.
Яғни жастарға қойылған міндет – қоғамда кездесетін нақты мәселелерге үңіліп, технология мен инновацияны пайдалана отырып, оның тиімді шешімін ұсыну.
Сондай-ақ іс-шара барысында «Atyrau Tech Invest» компаниясының маманы, ABAP Developer және ERP жүйелері бойынша жобаларды жүзеге асырып жүрген тәжірибелі IT маманы Даниэль Хасанов та қатысушыларға өз тәжірибесімен бөліседі.
«Atyrau Youth Hackathon – 2026» барысында жастарға командалық жұмыс дағдыларын жетілдіруге, тәжірибелі мамандардан кеңес алуға және идеясын нақты жобаға айналдыруға мүмкіндік беріліп отыр.
Бүгін басталған хакатонның алғашқы күнінде-ақ қатысушылар арасында қызу пікір алмасу, идея талқылау мен жобаларды нақтылау жұмыстары басталды. Ендігі екі күнде бұл идеялардың қаншалықты өміршең жобаға айналатыны, қойылған үш кейстің нақты шешімін таба алатыны сынға түседі.
Алмас ҚАБДОЛ
Суреттер автордікі
