Уақыт талабына сай мемлекеттік қызмет көрсету жүйесін жетілдіру – бүгінгі күннің өзекті мәселелерінің бірі. Қазіргі қоғам жылдамдық пен тиімділікті талап етеді. Азаматтар өзіне қажетті қызметті ұзақ күтпей, артық құжат жинамай, қысқа мерзімде әрі ашық түрде алғысы келеді. Сондықтан адамдардың сұранысын жедел қанағаттандыратын, қолжетімді әрі түсінікті жүйе қалыптастыру – мемлекеттің басты міндеттерінің бірі.
Бұрынғыдай ұзақ кезекке тұру, қағаз құжаттарды қайта-қайта толтыру, бір мекемеден екіншісіне сабылу – уақытты да, жүйкені де тоздыратын үдеріс еді. Мұндай қағазбастылық азаматтардың мемлекеттік органдарға деген сенімін әлсірететіні жасырын емес. Ал заманауи цифрлық шешімдер бұл мәселені түбегейлі өзгертуге мүмкіндік береді. Электронды форматтағы қызметтер, онлайн өтініш беру, автоматтандырылған деректер алмасу жүйелері – осының айқын дәлелі. Қолжетімді әрі тиімді ұйымдастырылған мемлекеттік қызмет көрсету жүйесі уақытты үнемдеп қана қоймай, ашықтық пен әділдікті қамтамасыз етеді.
Сонымен қатар, цифрландыру ішкі құжат айналымын ретке келтіруге үлкен септігін тигізеді. Қағаз түріндегі құжаттардың азаюы адами фактордың ықпалын төмендетіп, қателіктердің алдын алады. Ақпараттың бірыңғай базаға жинақталуы басқару шешімдерін жедел қабылдауға жағдай жасайды. Бұл өз кезегінде мемлекеттік органдар жұмысының сапасын арттырып, тиімділігін күшейтеді.
Қолжетімді жүйе – тұтынушы мен мемлекет арасындағы байланыстың нығаюына ықпал ететін маңызды құрал. Азамат қызметті оңай әрі тез алғанда, оның мемлекеттік институттарға деген сенімі артады. Сенім бар жерде тұрақтылық бар. Ал тұрақтылық – ел дамуының кепілі. Сондықтан мемлекеттік қызмет көрсету саласын жаңғырту тек техникалық өзгеріс емес, ол – басқару мәдениетін жаңарту, қоғаммен ашық әрі тиімді диалог орнату жолындағы маңызды қадам.
Уақыт талабына жауап беретін, қағазбастылықтан арылтатын, ашық әрі қолжетімді мемлекеттік қызмет көрсету жүйесін қалыптастыру – мемлекеттің стратегиялық міндеті. Мұндай жүйе ішкі құжат айналымын тәртіпке келтіріп қана қоймай, азаматтардың сенімін арттырып, қоғамның жалпы дамуына оң әсерін тигізері сөзсіз.
Рафиғат ТАЖИДЕНОВА,
Қамысқала ауылдық округінің әкімі
