Президент Тоқаев көтеріп отырған иммиграциялық, қаржылық және экономикалық алаяқтық мәселелері қазіргі Қазақстан үшін аса өзекті әрі уақыт талабына сай. Әлемдік тәжірибеге көз жүгіртсек, Еуропа мен АҚШ-та заңсыз миграция мен онымен байланысты қылмыстардың қоғамға, экономикаға және қауіпсіздікке қаншалықты кері әсер етіп отырғанын анық көруге болады. Сондықтан бұл проблеманың Қазақстанда алдын ала айтылып, нақты шаралар қабылдануы – стратегиялық тұрғыдан дұрыс шешім.
Иммиграциялық алаяқтық тек заңсыз құжат жасаумен шектелмейді. Ол ұлттық қауіпсіздікке, еңбек нарығына, әлеуметтік тұрақтылыққа тікелей қауіп төндіреді. Шетел азаматтарына заңсыз құжаттар беру арқылы әрекет ететін алаяқтар мемлекеттік жүйеге деген сенімді әлсіретіп, көлеңкелі экономиканың дамуына жол ашады. Осы тұрғыда құқық қорғау органдарының мұндай қылмыстарды анықтап, жолын кесуі – мемлекеттің заң үстемдігін қамтамасыз етудегі маңызды қадам.
Президент атап өткендей, қаржылық және экономикалық алаяқтықпен күресте жауапкершілік барлығына бірдей болуы тиіс. Жеке тұлға болсын, ұйымдасқан қылмыстық топ болсын – заң алдында бәрі тең. Қатаң жауапкершілік қана алаяқтықтың алдын алып, қоғамды деструкциядан қорғай алады. Бұл әділеттілік қағидатын нығайтып, азаматтардың мемлекетке деген сенімін арттырады.
Сонымен қатар, Тоқаевтың азаматтардың жеке деректерін қорғау және қаржылық, цифрлық сауаттылықты арттыру жөніндегі пікірі ерекше маңызға ие. Қазіргі цифрландыру дәуірінде алаяқтар адамдардың білімсіздігін, ақпаратқа бейқамдығын жиі пайдаланады. Сондықтан халықтың қаржылық және цифрлық сауаттылығын арттыру – тек мемлекеттің емес, бүкіл қоғамның ортақ міндеті. Ақпаратты дұрыс пайдалана алатын, өз деректерін қорғай білетін азамат – алаяқтыққа қарсы ең мықты тосқауыл.
Қорытындылай келе, Президент Тоқаев көтерген мәселелер Қазақстанның қауіпсіз, тұрақты және әділетті қоғам құру жолындағы маңызды басымдықтарды айқындайды. Алаяқтықтың барлық түрімен жүйелі күрес, заңның қатаң орындалуы және азаматтардың саналы көзқарасы ғана елдің ұзақ мерзімді дамуын қамтамасыз ете алады.
Жайдарман Мұхтарова,
Аққыстау ауылдық округінің бас маманы
