Жаңа Конституция — елдің табысын тек табиғи ресурстардың көлемімен емес, ең алдымен адам капиталының сапасымен, азаматтардың білімімен және зияткерлік әлеуетімен өлшейтін заманауи мемлекет құрудың берік негізі болып табылады. Бұл құжатта білім беру, ғылым мен инновацияны дамытуға ерекше мән берілуі мемлекеттің ұзақ мерзімді даму стратегиясының айқын көрінісі деуге болады. Себебі қазіргі жаһандану жағдайында елдің бәсекеге қабілеттілігі табиғи байлықтарға ғана емес, білімді, кәсіби әрі ойлы азаматтарға тікелей байланысты.
Конституцияда адам капиталы елдің басты құндылығы ретінде қарастырылып, әрбір азаматтың сапалы білім алуына, кәсіби дамуына және өз әлеуетін толық жүзеге асыруына мүмкіндік жасау басты мақсат ретінде белгіленген. Бұл мемлекет үшін де, қоғам үшін де маңызды қадам. Білімді ұрпақ – тұрақты экономиканың, инновациялық дамудың және әлеуметтік әділеттіліктің негізі.
Сонымен қатар, жаңа Конституция ғылым мен технологияны дамытуға, цифрлық шешімдерді енгізуге және зияткерлік еңбекті қорғауға бағытталған нақты нормаларды қамтиды. Мұндай өзгерістер ел экономикасының құрылымын әртараптандыруға, жаңа жұмыс орындарын ашуға және жоғары қосылған құны бар өнімдерді өндіруге жол ашады. Нәтижесінде Қазақстан табиғи ресурстарға тәуелділіктен біртіндеп арылып, білімге негізделген экономикаға қадам басады.
Жаңа Конституция адамды, оның білімін, қабілеті мен еңбегін мемлекеттің басты байлығы ретінде мойындайды. Бұл – Қазақстанның болашағын айқындайтын, заманауи, әділетті және дамыған қоғам құруға бағытталған маңызды тарихи құжат.
Айгүл АДИЛОВА,
Зинеден ауылдық округінің әкімі
