Мемлекет басшысының Салық кодексіне қатысты айтқан сыны – қоғамдағы қазіргі әлеуметтік-экономикалық үдерістерді терең түсінуден туған маңызды көзқарас. Президент атап өткендей, Салық кодексін өзгермейтін, «қасиетті» құжат ретінде қабылдау дұрыс емес. Өйткені қоғам үнемі дамып, экономикалық қатынастар күрделене түскен сайын заңнамалық негіз де сол өзгерістерге бейімделіп отыруы қажет. Бұл – тиімді және әділетті салық жүйесін қалыптастырудың басты шарты.
Қазіргі таңда Қазақстан қоғамы трансформация кезеңінен өтіп жатыр. Экономиканың құрылымы өзгеруде, кәсіпкерлік дамып келеді, жаңа жұмыс форматтары мен цифрлық қызмет түрлері пайда болуда. Мұндай жағдайда салық саясаты қоғамның нақты қажеттіліктеріне жауап беруі тиіс. Президенттің кері байланыстың белсенді арналарына ерекше мән беруі – халық пен мемлекет арасындағы ашық диалогты нығайтуға бағытталған қадам. Азаматтардың өтініштері мен ұсыныстарын жүйелі түрде талдау билікке ел ішіндегі өзекті мәселелерді дер кезінде анықтауға мүмкіндік береді.
Сонымен қатар, халықтың көңіл күйін сезіну және олардың үміт-тілектеріне уақытылы жауап беру әлеуметтік тұрақтылықты сақтауда маңызды рөл атқарады. Егер салық жүйесі әділетсіз немесе түсініксіз деп қабылданса, бұл қоғамда наразылық тудыруы мүмкін. Ал керісінше, азаматтардың пікірі ескеріліп, салық саясаты ашық әрі түсінікті болса, мемлекетке деген сенім артады, салық төлеу мәдениеті қалыптасады.
Президенттің Салық кодексіне қатысты айтқан пікірі – заманауи, икемді және халыққа жақын салық жүйесін қалыптастырудың маңызын көрсетеді. Кері байланысқа негізделген заңнамалық өзгерістер елдің нақты сұраныстарына сай шешімдер қабылдауға мүмкіндік беріп, қоғам мен мемлекеттің өзара сенімін нығайтады.
Гаухар ТӨЛЕГЕНОВА,
есепші
Исатай ауданы
