Қаржылық қауіпсіздік – мемлекеттің тұрақтылығы мен тәуелсіздігінің басты тіректерінің бірі. Осы тұрғыдан алғанда Мемлекет басшысы Қасым-Жомарт Тоқаевтың Қаржылық мониторинг агенттігінде өткен жиындағы сөзі – тек сала мамандарына берілген баға ғана емес, ел дамуының стратегиялық бағытын айқындайтын маңызды ойлар жиынтығы.
Президенттің Агенттіктің қысқа уақыт ішінде дербес әрі ықпалды құрылымға айналғанын атап өтуі – сала қызметкерлерінің табанды еңбегіне берілген әділ баға. Бес жыл – мемлекеттік институт үшін ұзақ мерзім емес. Алайда осы уақыт ішінде жинақталған тәжірибе мен қалыптасқан жүйе қаржылық қауіпсіздікті қамтамасыз етуде маңызды рөл атқарып отырғанын көрсетеді.
Сонымен бірге Мемлекет басшысының «босаңсуға болмайды» деген сөзі бүгінгі заман талабынан туындаған нақты ескерту іспетті. Себебі цифрлық технология мен жасанды интеллект қарқынды дамыған кезеңде қаржылық қылмыстардың сипаты да күрделене түсуде. Демек, дәстүрлі әдістермен ғана шектелу жеткіліксіз. Бұл салада жаңаша ойлау, заманауи тәсілдер мен интеллектуалдық ресурстарды тиімді пайдалану – уақыт талабы.
Президенттің «жаңа көзқарас қажет» деген ұстанымы – мемлекеттік басқарудың барлық деңгейіне ортақ міндет. Бұл – тек бақылау емес, алдын алу, тек тексеру емес, талдау, тек реакция емес, стратегиялық жоспарлау қағидаттарына көшу қажеттігін аңғартады.
Сондықтан Қаржылық мониторинг агенттігінің алдағы кезеңдегі жұмысы тек құқықтық шеңберде емес, цифрлық мүмкіндіктер мен аналитикалық әлеуетке сүйенген жаңа сапалық деңгейге көтерілуі тиіс. Мемлекет басшысы көтерген бұл мәселе – еліміздің экономикалық қауіпсіздігін нығайтуға бағытталған маңызды бағдар.
Қорытындылай айтқанда, Президенттің бұл жиындағы сөзі – салаға қойылған талап қана емес, ел болашағына қатысты жауапкершілікті терең сезінуге шақырған стратегиялық үндеу. Ал бұл үндеуге лайық жауап – кәсіби біліктілік, жаңашыл ойлау және мемлекеттік мүддеге адал қызмет.
М.МАНСЫРОВ,
еңбек ардагері
