Президенттің әуе жолдарын дамытуға қатысты пікірі көлік-логистика саласындағы стратегиялық көзқарастың өзгеру қажеттігін айқын көрсетеді. Жаңа халықаралық рейстерді ашу – тек экономикалық пайда көзі ғана емес, Қазақстанның ашық, бәсекеге қабілетті және жаһандық процестерге белсенді қатысушы мемлекет ретіндегі имиджін нығайтатын маңызды фактор. Әуе қатынасының кеңеюі инвестициялық тартымдылықты арттырып, туризм мен іскерлік байланыстардың дамуына серпін береді.
Қазақстанның географиялық орналасуы – оның басты артықшылығы. Ел аумағы арқылы өтетін халықаралық әуе маршруттары транзиттік әлеуеттің жоғары екенін дәлелдейді. Бұл мүмкіндікті тиімді пайдалану Қазақстанды халықаралық транзиттік-транспорттық түйінге айналдыруға жол ашады. Алайда бұл үшін тек декларативті мәлімдемелер емес, нақты және жүйелі саясат қажет.
Президенттің жүк авиациясына ерекше назар аударуы орынды. Әуе жүк тасымалы – жаһандық сауда мен логистиканың ең серпінді дамып жатқан бағыттарының бірі. Қазақстанның әлі күнге дейін Еуразиялық жүк авиациясының орталығына айналмауы – стратегиялық мүмкіндіктің толық пайдаланылмағанын көрсетеді. Бұл, ең алдымен, басқару модельдерінің тиімсіздігімен байланысты.
Жүк авиациясын дамыту міндетінің темір жол компаниясына жүктелуі логикалық және практикалық тұрғыдан сұрақтар тудырады. Әртүрлі көлік салаларын бір құрылым арқылы басқару тиімді нәтиже бермей отырғаны байқалады. Осы тұрғыдан алғанда, Мемлекет басшысының бұл функцияны жеке секторға беру мүмкіндігін қарастыру туралы пікірі – нарықтық тетіктерге негізделген прагматикалық қадам. Жеке сектордың икемділігі, инвестициялық мүмкіндіктері мен басқару тәжірибесі саланың дамуына жаңа серпін беруі мүмкін.
Жалпы, Президенттің бұл ұстанымы әуе тасымалы саласын қайта форматтауды, нақты стратегия мен жауапты орындаушыларды айқындауды талап етеді. Егер бұл бағытта батыл әрі ойластырылған шешімдер қабылданса, Қазақстанның халықаралық логистикадағы рөлі едәуір күшейіп, экономиканың ұзақ мерзімді өсіміне нақты үлес қосары сөзсіз.
Қарлығаш ГИЛИМОВА;
ардагер ұстаз
