Жаңа Конституция – қоғамның дамуы мен тұрақтылығын қамтамасыз ететін аса маңызды құжат. Ол мемлекеттің стратегиялық бағытын айқындап қана қоймай, ел өмірінің барлық саласына серпін беретін негізгі құқықтық тірек қызметін атқарады. Қоғамдағы келісім мен бірлікті нығайту, тұрақтылықты сақтау және ұзақ мерзімді даму мақсаттарына қол жеткізу – осы құжаттың басты миссияларының бірі.
Жаңа Конституция әрбір азаматтың құқықтары мен бостандықтарын қорғауды басты мақсат етеді. Адамның өмірі, ар-намысы, қадір-қасиеті ең жоғары құндылық ретінде танылып, заңмен нақты бекітіледі. Бұл – әділетті қоғам құру жолындағы берік негіз. Әр азаматтың пікір білдіруіне, білім алуына, еңбек етуіне және еркін өмір сүруіне құқықтық кепілдік берілуі мемлекетіміздің демократиялық даму бағытын айқындайды.
Сонымен қатар, Конституция мемлекет пен қоғам арасындағы жауапкершілік пен үйлесімділікті нығайтады. Мемлекет халық алдында ашық әрі есеп беруге міндетті болса, азаматтар заң талаптарын сақтауға және ел дамуына үлес қосуға жауапты. Осындай өзара сенім мен жауапкершілік қана тұрақты әрі тиімді басқару жүйесін қалыптастырады.
Жаңа өзгерістер мемлекеттік институттардың жұмысын жетілдіріп, билік тармақтарының тепе-теңдігін сақтауға мүмкіндік береді. Бұл шешімдер қоғамдағы әділдік қағидатын орнықтырып, әр адамның құқықтық қорғалу деңгейін арттырады. Нәтижесінде елдегі әлеуметтік тұрақтылық күшейіп, экономикалық және рухани даму үдерістері жүйелі түрде жүзеге асады.
Қорытындылай келе, Жаңа Конституция – ел болашағына бағытталған тарихи әрі жауапты қадам. Ол қоғамның бірлігін бекемдеп, азаматтардың құқықтарын қорғап, мемлекетіміздің тұрақты әрі қарқынды дамуына жол ашатын негізгі құжат болып қала береді.
Анес СИДЕҒАЛИЕВ,
Исатай аудандық мәслихат депутаты
