2025 жылғы Қазақстан Республикасының Президенті Қасым-Жомарт Тоқаевтың Қазақстан халқына Жолдауы – елдің болашақ дамуына бағытталған аса маңызды әрі уақыт талабына толық жауап беретін стратегиялық құжат. Әсіресе Жолдауда жасанды интеллектті дамыту мәселесінің негізгі басымдықтардың бірі ретінде айқындалуы – Қазақстанның жаһандық технологиялық үдерістерден шет қалмай, керісінше, сол үдерістердің белсенді қатысушысы болуға ұмтылатынын көрсетеді.
Бүгінгі таңда жасанды интеллект тек технология саласының жетістігі емес, ол экономиканың, білім берудің, денсаулық сақтаудың, мемлекеттік басқарудың және әлеуметтік өмірдің ажырамас бөлігіне айналып отыр. Осы тұрғыдан алғанда, Президенттің жасанды интеллектті ел дамуының басты қозғаушы күштерінің бірі ретінде атап өтуі өте орынды деп санаймын. Бұл Қазақстанды шикізатқа тәуелді экономикадан білімге, инновацияға және зияткерлік әлеуетке негізделген экономикаға көшірудің нақты қадамы болып табылады.
Жолдауда жасанды интеллектті енгізу арқылы мемлекеттік қызметтердің тиімділігін арттыру, басқару жүйесін жеңілдету және азаматтар үшін қолайлы жағдай жасау мәселелері көтерілді. Мен бұл бастамалардың халықтың мемлекетке деген сенімін арттыруға және ашық, заманауи басқару моделін қалыптастыруға оң әсер ететініне сенемін. Сонымен қатар, жасанды интеллектті денсаулық сақтау, ауыл шаруашылығы, энергетика сияқты маңызды салаларда қолдану елдің экономикалық әлеуетін күшейтіп, еңбек өнімділігін арттыруға мүмкіндік береді.
Жолдауда ерекше назар аудартқан тағы бір маңызды мәселе – жасанды интеллект саласында кадр даярлау және білім беру жүйесін жаңғырту. Менің ойымша, бұл – ең өзекті бағыттардың бірі. Себебі кез келген технологияны дамытудың басты негізі – білікті маман. Жастардың цифрлық сауаттылығын арттыру, жасанды интеллектпен жұмыс істей алатын жаңа буын мамандарын даярлау еліміздің ұзақ мерзімді дамуына берік негіз қалайды.
Сонымен қатар, Президент жасанды интеллектті жауапты әрі этикалық тұрғыда қолдану қажеттігін де атап өтті. Бұл өте маңызды ұстаным деп есептеймін. Өйткені технологиялық даму адам құндылықтарына, әлеуметтік әділеттілікке және қауіпсіздікке нұқсан келтірмеуі тиіс. Жасанды интеллект қоғам игілігіне қызмет етіп, барлық азаматтарға тең мүмкіндік беруі керек.
2025 жылғы Жолдауда жасанды интеллектке ерекше көңіл бөлінуі Қазақстанның болашаққа нақты бағдармен қадам басып келе жатқанын көрсетеді. Бұл бастамалар уақтылы әрі жүйелі түрде жүзеге асса, еліміз цифрлық даму мен инновация саласында аймақтағы көшбасшы мемлекеттердің біріне айналатынына сенемін. Мен бұл Жолдауды Қазақстанның зияткерлік және технологиялық тұрғыдан жаңғыруына жол ашатын маңызды тарихи құжат деп бағалаймын.
Анжела ЖАНТЕМІРҚЫЗЫ,
қазақ тілі мен әдебиеті пәнінің мұғалімі
Зинеден ауылы
