Бүгін Исатай аудандық «Жалын» мәдениет үйінде Конституция күніне арналған салтанатты мерекелік шара болып өтті.
Шарада сөз алған аудан әкімінің орынбасары Болатбек Сисатов аудан тұрғындарын мерекемен құттықтады. – Ортақ мақсатымыз - жалпыұлттық бірлік пен тұрақтылықты нығайту, азаматтық жауапкершілікті арттыру, қоғамда тұрақтылық пен келісімді сақтау. Конституция күні Тәуелсіздігіміз бен тұтастығымызды, тыныштығымыз бен бейбіт тірлігімізді көздің қарашығындай сақтауға шақыра отырып, сіздерге зор денсаулық, отбасыларыңызға береке, Отанымыздың дамуы мен гүлденуі жолындағы қажырлы еңбектеріңізге жеміс тілеймін, - деген ол. Сондай-ақ аудан әкімінің орынбасары бірқатар сала үздіктеріне облыс, аудан әкімдерінің алғыс хаттарын табыстады.
Шарада Қазақстан Республикасы Президентінің Жарлығымен Қадирова Жанар Амангелдіқызы «Алтын алқа», Мубаракова Тураркуль Кадирбаевна «Күміс алқа» иегері атанды.
Мерекелік кеш әсем әндермен, күмбірлі күй мен мың бұралған бимен әрленді.
С.МҰРАТХАН.
