Жуырда аудандық полиция бөлімінің 2024 жылы атқарған жұмыстары туралы есебі тыңдалды. Аудан әкімдігінің мәжіліс залында өткен жиынды аудандық мәслихат төрағасы Аманжол Рахметов ашып, жүргізіп отырды. Есеп беру жиынына аудан әкімі Нұрым Мусин, аудан әкімінің орынбасары Нұрғайша Абежан, аудандық полиция бөлімі қызметкерлері, дербес бөлім басшылары мен ауылдық округ әкімдері, мәслихат депутаттары және ауыл тұрғындары қатысты.
Күн тәртібіндегі мәселе бойынша аудандық полиция бөлімінің бастығы, полиция подполковнигі Данияр Бимұханов қылмыстық ахуал мен құқық бұзушылықтың алдын алу жұмыстары жөнінде баяндама жасады. Ол алаяқтық фактілерінің көбейіп жатқанын атап өтіп, тұрғындарды қауіпсіздік шараларын сақтауға шақырды. Сондай-ақ, жол-көлік оқиғаларына тоқталып, мопед пен көлік басқаруға қатысты заңға енгізілген өзгерістер туралы айтты.
Баяндама аяқталғаннан кейін тұрғындар өздерін толғандырған сұрақтарын қойды. Өркен елді мекенінің тұрғыны Қ.Танауова:
— Жасөспірімдердің түнгі бейуақытқа дейін жүруі, темекі шегуі, мопедпен топтасып қозғалуы жиілеп кетті. Бұл – үлкен мәселе. Тәртіпті күшейту керек. Бұл жерде тек полиция қызметкерлеріне ғана міндет жүктеуге болмайды, ата-аналар мен мектеп мұғалімдері де жауапкершілікті сезінуі тиіс. Балаларының тәрбиесіне мән бермейтін ата-аналар қайда қарап отыр? - деген сауалын қойды.
Бұл пікірді көпшілік қолдап, мәселенің маңыздылығын атап өтті. Жауап ретінде Данияр Бимұханов аудан көлеміндегі 16 мектеп оқушылары мен жасөспірімдер арасында құқық бұзушылықтың алдын алу бағытында аудандық білім бөлімі мен прокуратура қызметкерлерімен бірлескен түсіндіру жұмыстары жүргізіліп жатқанын айтты. Соның ішінде оқушыларға «Қылмыс пен жауапкершілік», «Зорлық-зомбылықтың алдын алу», «Интернеттің әлегі», «Бопсалаушылық және әлімжеттік», «Нашақорлыққа жол жоқ», «Терроризм актісі кезіндегі әрекеттер» сияқты тақырыптарда «196» профилактикалық кездесулер өткізіліп тұратынын жеткізді.
Содан соң Тұщықұдық ауылының тұрғыны Өмірбек Хайруллаев:
- Ауданымызда тіркелмеген мопедтер бар ма? Қытай мопедін қалай тіркеуге болады? - деген сауалын қойды.
Бөлім басшысы бұл сұраққа жауап беріп, мопедтерді тіркеу 2025 жылдың 5 сәуірінен бастап мопедтер ресми түрде механикалық көліктерге жатқызылып, оларды тіркемей және құқықсыз пайдалануға тыйым салынады. Осыған байланысты тәртіп сақшылары әлеуметтік желі арқылы түсіндіру жұмыстарын жүргізіп, заңдастыру үшін қажетті құжаттар мен тіркеу орындары туралы толық ақпарат таратып жатқанын жеткізді. Қазіргі таңда аудан бойынша 13 мопед ресми тіркелген.
Жиын соңында интернет-алаяқтық, сотталғандардың есебін жүргізу сияқты өзекті мәселелер талқыланып, олардың қатаң бақылауда екені айтылды.
Сағыныш САЙЛАУБАЙ
