Аудан халқының әл-ауқатын арттырып, тұрмыс сапасын жақсартуда жол құрылысының орны ерекше. Өйткені тұрғындар үшін ең өзекті мәселелердің бірі – сапалы жолмен қатынау болатын. Соңғы жылдары көтеріліп жүрген осы күрмеулі мәселе биыл біртіндеп шешімін таба бастады. Аудан әкімдігі мен «ҚазАвтоЖол» ҰҚ АҚ-ның Атырау облысы бойынша филиалы, сондай-ақ олардың мердігер мекемелері – «Тодини Конструциони Дженерали С.П.А.» және «Ақ Жол-Құрылыс» жауапкершілігі шектеулі серіктестіктер арасында жасалған меморандум аясында нақты міндеттемелер белгіленіп, жос-парлы жұмыстар қолға алынған еді. Осыған сәйкес, биыл ауданның бірнеше аумағында жол төсеу жұмыстары қарқынды жүріп жатыр.
Әсіресе Аққыстау ауылындағы Өркен елді мекенінің 3-көшесі ерекше назарға алынды. Бұл көше – кезінде «NCOC» компаниясының демеушілігімен салынған 60 пәтерлік тұрғын үйге апаратын негізгі жол. Тұрғындардың талайдан күткен тілегі орындалып, ұзындығы 550 метр болатын асфальт төсеу жұмыстары жүргізілді. Нәтижесінде жаңа жол ел игілігіне пайдалануға берілді.
Аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Нұрбол Жампейісов бұл істің маңыздылығына тоқталып:
– Жаңа жол ауыл тұрғындарының жүріп-тұруын жеңілдетіп қана қоймай, елді мекеннің келбетіне әр бермек. Әсіресе, тұрғын үй кешеніне қоныстанатын отбасылар үшін бұл үлкен қуаныш. Өйткені мектепке, балабақшаға және жұмыс орындарына қатынау әлдеқайда ыңғайлы әрі қауіпсіз бола түспек,-дейді.
Аудан әкімдігі мен мердігер мекемелердің бірлескен еңбегі нәтижесінде сапалы инфрақұрылым жүйесін дамыту жұмыстары жалғасуда. Алдағы уақытта да халықтың әлеуметтік жағдайына оң ықпал ететін жобаларға қолдау көрсетілмек. Осылайша, «Жол – өмірдің күретамыры» деген сөз Исатай жерінде тағы бір мәрте өз мәнін тауып отыр.
Еркебұлан УАЛИТХАН
