Бүгін Исатай ауданының орталығы –Аққыстау ауылдық округінде өткен әкім сайлауына дауыс беру рәсімі аяқталды.
Сайлау учаскелері кешкі сағат 20:00-де жабылып, одан кейін дауыс санау процесі басталды. Аққыстау ауылдық округіне Өркен және Томан елді мекендері кіреді. Жалпы халық саны – 9855 адам болса, олардың 6020-сы – дауыс беруге құқығы бар сайлаушылар.
Ауылдық округте барлығы 6 сайлау учаскесі жұмыс істеді. Ресми мәлімет бойынша, бүгінгі саяси науқанда 3318 адам өз таңдауын жасап, сайлауға қатысқан. Бұл – округ бойынша тіркелген сайлаушылардың 55,1 пайызы.
Әзірге үміткерлерге қанша пайыз дауыс берілгені жөнінде ақпарат жарияланған жоқ. Дауыс санау нәтижелері шыққан соң, толық мәліметтер тиісті органдар арқылы ресми түрде хабарланатын болады.
