Исатай, Индер аудандарының және Атырау облысының Құрметті азаматы Маштахов Ғатих Садихұлының 100 жылдығына арналған ардагерлер арасындағы аудандық спартакиада өтті.
Спартакиаданың мақсаты – Ғатих Садихұлының есімін жас ұрпаққа насихаттау, ардагерлер арасында салауатты өмір салтын қалыптастыру, өмірі мен еңбек жолын үлгі ету, ересектер арасында бұқаралық спортты дамыту.
Ашылу салтанатында аудан әкімі Нұрым Мусин зейнет жасына қарамастан спортты жанына серік еткен аудан ардагерлеріне сәттілік тіледі. Сондай-ақ ардақты атаның ұрпақтары да өздерінің игі тілектерін білдірді.
Спартакиадаға Аққыстау, Исатай, Тұщықұдық, Қамысқала, Зинеден, Жанбай ауылдарының ақсақалдары қатысып, бильярдтан, шахматтан, үстел теннисінен сайысқа түсті.
Жарыс нәтижесі бойынша шахмат ойынынан үшінші орын – Кенжешов Құрманбекке (Исатай), екінші орын Жалекеев Қамбарға (Қамысқала), бірінші орын – Елешов Қинатоллаға (Жанбай) бұйырды. Үстел теннисінде үшінші орынды –Шарапиденов Мұрасқали (Жанбай), екінші орынды – Дүйсенов Әлібек (Тұщықұдық), бірінші орынды – Насимуллин Ерболат (Аққыстау) жеңіп алды. Бильярдтан Қойшығұлов Сәтқалимен (Зинеден), Серікқалиев Қамидолла (Жанбай) үшінші және екінші орындарды бөліссе, Аманбаев Төлеуғали (Аққыстау) бірінші орынды иеленді.
Жұлдыз СЕМБИЕВА
