Жаңа оқу жылы – жаңа үміт, жаңа мақсат. Осы жауапты кезең алдында ұстаздар үшін дәстүрге айналған тамыз кеңесінің орны бөлек. Бұл бір жылдық еңбектің қорытындысы ғана емес, болашақтағы білім сапасының бағытын белгілейтін маңызды алаң. Сол себепті де педагогтер үшін тамыз кеңесі – кәсіби дамудың, ой-пікір тоғысының, жаңашыл идеялардың бастауы. Биылғы аудандық кеңес Өнер мектебінде өтіп, ұстаздардың басын бір арнаға тоғыстырып, білім саласындағы жаңа міндеттер мен жаңашыл бастамаларды талқылауға мүмкіндік берді.
«Білім келешегі: адал азамат, кәсіби маман» деген тақырыппен өрбіген басқосудың мақсаты да айқын еді. Мұндағы мақсат заман талабына сай цифрландыру үдерісіндегі сын-қатерлер мен мүмкіндіктерді ескере отырып, білім беру сапасын арттыру жолдарын талқылау.
Жиынға аудан мектептерінің педагогтерімен қатар бөлім басшылары, әдіскерлер, сала ардагерлері, сондай-ақ арнайы шақырылған қонақтар қатысты. Модератор міндетін аудандық білім бөлімінің басшысы Гүлайна Құрманғалиева атқарып, ұстаздардың қоғамдағы орны мен жаңа оқу жылынан күтілетін басты басымдықтарға тоқталды.
Кеңесте аудан әкімінің міндетін атқарушы Жақсылық Жанұзақов сөз сөйлеп, «Ұстаз – ұлттың ұстыны» деген терең ойды атап өтті. Оның айтуынша, оқушыға тек білім беріп қана қоймай, елін сүйетін адал азамат етіп тәрбиелеу – бүгінгі күннің өзекті талабы. Бұл ой жиынның тақырыбымен де үйлесіп, ұстаздардың жауапкершілігін айқын көрсетті.
Жиын барысында облыстық деңгейдегі маңызды құжаттар да назарға ұсынылды. Атырау облысы білім беру басқармасының әдістемелік орталық басшысы Досжан Болатбекұлы Қазақстан Республикасы Оқу-ағарту министрлігінің 2025 жылғы облыстық тамыз конференциясының қарарын таныстырып, алдағы жылдардағы басым бағыттарға тоқталды. Ал «Кювижн» компаниясының директоры Ердәулет Жақыпұлы толықтырылған шынайлылық технологиясын оқу үдерісіне енгізу арқылы білім сапасын арттыруға болатындығын тәжірибе арқылы көрсетті.
– Q-Vision компаниясы – білім беру саласына арналған инновациялық ІТ-шешімдер әзірлейтін отандық компания. Біз бірнеше жыл бойы Қазақстан Республикасы Оқу-ағарту министрлігімен тығыз жұмыс істеп келеміз. Сол жобалардың бірі – «Адал Азамат» бірыңғай бағдарламасының брендбугі. Бұл – еліміздегі барлық мектептер үшін бірыңғай дизайн мен тәрбиелік мазмұнды қалыптастыратын әдістемелік құжат. ҚР Оқу-ағарту министрлігімен бірлесе әзірлеген бұл брендбук 200-ден астам бетті қамтиды. Ол тек эстетикалық үлгі ғана емес, оқушыларға патриоттық тәрбие мен ұлттық құндылықтарды сіңіруге бағытталған маңызды құрал болып саналады. Айта кету керек, бұл құжат біздің тарапымыздан үнемі толықтырылып, жаңартылып отырады. Компания жұмысы ҚР Оқу-ағарту министрлігінің алғыс хатымен бағаланды. Сонымен қатар, біз республикалық тамыз кеңесіне тұрақты түрде қатысып, еліміздің 18 өңірінде (15 облыс және республикалық маңызы бар 3 қала) өз жобаларымызды таныстырып келеміз. Қазіргі таңда біз ұсынып отырған негізгі шешім – Q-Vision интерактивті білім беру стенд-платформасы. Бұл – мектептерге арналған толыққанды цифрлық экожүйе. Ол тек ақпарат жеткізуші құрал ғана емес, білім беру процесін түбегейлі өзгертетін жаңа технологиялық орта.Біздің мақсатымыз – білім беру үдерісін жаңа деңгейге көтеріп, оқушыға сапалы әрі заманауи орта қалыптастыру,-дейді компания директоры Ердәулет Жақыпұлы.
Иә, Q-Vision платформасы мектептерге арналған толыққанды цифрлық экожүйе. Оның басты ерекшелігі – QR код арқылы оқушылар мен мұғалімдер 3D-модельдерге, бейнесабақтарға, анимациялар мен AR/VR-контентке, сондай-ақ авторлық тест материалдарына жедел қол жеткізе алады. Сонымен бірге, бұл жүйе мектеп ішіндегі ақпарат алмасу үдерісін толықтай цифрландырады: сабақ кестесі мен ас мәзірін, түрлі хабарландыруларды немесе мұғалімдердің портфолиосын қағазға тәуелді етпей, онлайн түрде үнемі жаңартып отыруға мүмкіндік береді. Ең бастысы, ұсынылған контент мерзімсіз қолжетімді болып, жыл сайын тегін толықтырылып, жаңартылып отырады.
Осы сәтте кеңес қатысушылары Мемлекет басшысы Қасым-Жомарт Тоқаевтың «Білім саласындағы бастамалары» туралы бейнематериалды тамашалап, білім саласын дамытудағы мемлекеттік қолдау мен стратегиялық бағыттардан хабардар болды. Сондай-ақ министрлік өкілі Ерлан Қалмақовтың бейнежолдауы педагогтерге тың ой салды.
Кеңестің мазмұнын аудан мұғалімдерінің тәжірибелік баяндамалары толықтырды. Ж.Мырзағалиев атындағы орта мектеп директоры Жасұлан Алипов ауыл мектебінің сапа алаңы ретіндегі мүмкіндіктерін нақты мысалдармен жеткізсе, Ю.Гагарин атындағы мектептің директоры Айсұлу Саткалиева «Мақсатты мектептер жобасы» арқылы даму жолындағы бастамаларды таныстырды.
Ал мектеп-гимназия директорының инновациялық жұмыстар жөніндегі орынбасары, педагог-шебер Гүлфариза Калидуллина сабақ сапасын жетілдіруге арналған «Lesson walkthrough» әдісімен бөлісіп, әріптестеріне тиімді тәсілдер ұсынды. Осылайша, тамыз кеңесі ұстаздарға тек құттықтау мен ресми баяндамаларды емес, тәжірибе мен тың бастамаларды да сыйлаған мазмұнды алаң болды. Әрбір айтылған ой, ұсынылған жоба, көрсетілген бейнематериал ұстаздардың санасында «Білім келешегі – біздің қолымызда» деген ойды бекіте түсті.
Кеңес соңында ұстаздардың еңбегі елеусіз қалмады. Салада айрықша із қалдырып, жас ұрпақ тәрбиесіне зор үлес қосқан мұғалімдерге түрлі деңгейдегі марапаттар табысталды. Олардың қатарында Қазақстан Республикасы Оқу-ағарту министрінің, Орта білім комитетінің төрағасы Қанат Жұмашевтың, облыс әкімі Серік Шәпкеновтің, облыстық білім беру басқармасының, аудан әкімінің және аудандық білім бөлімінің Алғыс хаттары бар.Сонымен бірге, ұзақ жылғы еңбегі мен ұлағатты ұстаздық жолы үшін ардагер мұғалімдер аудандық білім бөлімі жанындағы ардагерлер кеңесінің арнайы төсбелгісімен марапатталды. Бұл – ұстаздық еңбектің биік мәртебесін айқындайтын құрмет, білім саласына сіңірген қажырлы еңбектің лайықты бағасы болды.
Жиын соңында қатысушылар бір ойға тоқтады: қазіргі қоғамға тек білімді ғана емес, адалдық пен жауапкершілікті бойына сіңірген азаматтар керек. Ал ондай ұрпақты қалыптастырудың басты міндеті – мұғалім иығында. Цифрландыру дәуірінде білім беру сапасын арттырудың жаңа әдістерін игеру, оқушының рухани болмысын қалыптастыру – бүгінгі ұстаздардың басты миссиясы болып қала бермек.
Жайна МӘЛІМҚОЖА
