Ауданда жаңа оқу жылы қарсаңында дәстүрге айналған «Мектепке жол» жалпы республикалық қайырымдылық акциясы биыл да жалғасын тапты. Аудан әкімдігінің қолдауымен, аудандық білім бөлімінің ұйымдастырған шараның негізгі мақсаты – әлеуметтік жағдайы төмен, көп балалы, жетім және ата-анасының қамқорлығынсыз қалған балаларға қолдау көрсету, сондай-ақ әлеуметтік себептер бойынша балалардың мектепке бармауының алдын алу.
Биыл аудан көлемінде мұқтаж отбасылардың деректер қоры жасақталып, оқушыларға нақты көмек көрсетілді. Игі іске жеке кәсіпкерлер, аудан әкімдігі, ауылдық округтер мен дербес бөлімдер, аудандық сот, полиция бөлімі және «Сенім шыңы» қоғамдық бірлестігі бірлесе атсалыс-ты. Нәтижесінде барлығы 68 балаға демеушілік қолдау көрсетіліп, оның ішінде 58 оқушыға түрлі мекемелер тарапынан, ал 10 балаға қоғамдық бірлестік атынан мектепке қажетті оқу құралдары мен сөмкелер табысталды.
Бұл қайырымды қадам – балалардың жаңа оқу жылын қуанышпен қарсы алып, толық дайындықпен баруына зор мүмкіндік берді. Акцияға аудан әкімдігімен қатар округ әкімдіктері, кәсіпкерлер, мәдениет және спорт бөлімі, жұмыспен қамту және әлеуметтік бағдарлама бөлімдері де белсенді қатысты.
Сонымен бірге жыл сайын дәстүрлі түрде өткізіліп келе жатқан «Amanat» партиясының «Бақытты отбасы» жобасы аясындағы «Мектепке баланы даярлайық» акциясы да биыл өз жалғасын тауып отыр. Исатай аудандық мәслихатының депутаты, «Amanat» партиясы фракциясының жетекшісі Асхат Жұмабеков әлеуметтік қолдауды қажет ететін бес отбасыға көмектесіп, олардың балаларына мектеп сөмкесі, оқу құралдары мен сабаққа арналған киім-кешек табыстады.
Мұндай шаралар – балалардың жаңа оқу жылына толық дайындықпен баруына жағдай жасап қана қоймай, ата-аналардың да алаңсыз болуына үлкен қолдау болып отыр. Қайырымдылық акциялары арқылы партия өкілдері мен аудан тұрғындары көп балалы және аз қамтылған отбасыларға жан-жақты қамқорлық көрсетуді жалғастыруды мақсат етеді. «Мектепке жол» – бұл тек көмек қана емес, балаларға жылулық пен үміт сыйлайтын ізгілікті дәстүр.
Камилла ҚҰРМАНҒАЗИЕВА
