Жуырда VIII шақырылған аудандық мәслихаттың кезекті XXXI сессиясы өтті. Маңызды жиынға аудан әкімі Нұрым Мусин, аудан әкімінің орынбасары Нұрғайша Абежан, аудандық қоғамдық кеңестің төрағасы Самат Есенов және ауылдық округ әкімдері мен мәслихат депутаттары қатысты. Сессияны аудандық мәслихат төрағасы Аманжол Рахметов жүргізді.
Сессияның күн тәртібінде үш мәселе қаралып, олар кеңінен талқыланды. Қаралған мәселелер бойынша тиісті сала басшыларына нақты ұсыныстар берілді. Алғашқы мәселе аудан тұрғындарына медициналық қызметтердің қолжетімділігі мен сапасын арттыруға арналды. Бұл бағыттағы атқарылып жатқан жұмыстар жөнінде аудандық аурухана директорының міндетін атқарушы Нұргүл Кабулова баяндама жасап, депутаттар тарапынан бірқатар сұрақтар қойылды. Талқылау барысында халыққа көрсетілетін медициналық көмекті жетілдіру, қызмет сапасын жақсарту және түйткілді мәселелерді шешу жолдары қарастырылды.
Нұргүл Кабулова аудандағы медициналық қызметтің жай-күйіне тоқталып, кадр тапшылығы мен материалдық-техникалық базаны жетілдіру мәселелерін көтерді. Оның айтуынша, қазіргі уақытта 23 913 тұрғынға 32 дәрігер мен 186 орта буын медицина қызметкері қызмет көрсетуде.
– Өткен жылы ауданға 1 реаниматолог, 6 жалпы тәжірибелік дәрігер және 1 статист-дәрігер келгенімен, 4 дәрігер жұмыстан кеткен. Бұл жағдай дәрігер мамандарына деген қажеттілікті одан әрі күшейтіп отыр. Әсіресе, жалпы практика дәрігері, акушер-гинеколог, рентгенолог және невропатолог мамандары жетіспейді. Аурухана материалдық-техникалық базаны нығайту бағытында жұмыс жүргізіп, қазіргі таңда қажетті құрал-жабдықтармен 93,7%-ға қамтылған. Қолданыста 3 УДЗ аппараты (екі эксперттік, бір жылжымалы), 4 рентген аппараты (жылжымалы, КамАЗ базасындағы, автобус ішіндегі және флюорографиялық) бар. Сонымен қатар биыл реабилитациялық ем жүргізуге қажетті құрал-жабдықтарға сұраныс берілді. Санитарлық көлік мәселесі де өзекті. Ауданда 12 санитарлық автокөлік бар, оның 3-еуі жөндеуде тұр. Осы жылы 1 реанимобиль мен 7 санитарлық көлік алу үшін өтінім берілді,-деп аудандық аурухана директорының міндетін атқарушы Нұргүл Измаилқызы бұл мәселелерді көтере отырып, халыққа сапалы медициналық қызмет көрсету үшін дәрігер тапшылығын жою және қажетті жабдықтармен толық қамту маңызды екенін атап өтті.
Ал бұл тарапқа тұрғындар тарапынан сұрақтар қойылып, сондай-ақ, мәслихат депутаттары айтылған мәселелердің оң шешім табуын тиісті сала мамандарына тапсырды.
Аудандық мәслихат депутаты Анес Сидегалиев денсаулығына байланысты сессияға қатыса алмағанымен, өзекті мәселені назардан тыс қалдырмады. Ол Атырау облысы әкімінің орынбасары Дарын Шамұратов пен облыстық білім беру басқармасының басшысы Марат Әбуовке жазбаша депутаттық сауал жолдап, Қамысқала ауылдық округіндегі Ғ.Мәсәлімов атындағы орта мектептің бүгінгі жай-күйін «Бізге заманауи мектеп қажет» деп ашық түрде көтерді. Бұл мәселеге қатысты сауал сессияда тыңдалып, мектептің тозығы жеткен ғимараты мен инфрақұрылымының толық қайта жаңғыртуды қажет ететіндігі айқын болды.
Халық қалаулысының айтуынша, мектеп 1966 жылы 560 орынға лайықталып салынғанымен, бүгінде мұнда 593 оқушы екі ауысыммен білім алуда. Ғимараттың сыртқы және ішкі келбеті қазіргі заман талаптарына жауап бере алмайды. Кезінде ата-әжелеріміз білім алған мектептің тозығы жетіп, оқушылар үшін қолайсыздық туғызуда. Мектеп спорттық алаңдар мен қажетті құрал-жабдықтардан толықтай мақұрым. Кабинеттердің жетіспеуі салдарынан акт залы оқу аудиториясына айналған, ал асхана буфет ретінде бейімделіп, балаларға лайықты жағдай жасалмаған. Гимнастикалық зал спорт залы есебінде пайдаланылып, бірақ онда оқушыларға киім ауыстыратын бөлме де, жуынатын орын да қарастырылмаған.
– Мектеп ғимаратының инженерлік инфрақұрылымы да сын көтермейді. Ауа тазарту және желдету жүйелері мүлде орнатылмаған, санитарлық талаптарға сәйкес келмейтін әжетханалар мен асханаларда кәріз жүйесі қол күшімен жасалған. Оқушылар мен мұғалімдер сырт киімдерін қоятын гардеробтың өзі жоқ. Оқу процесіне қажетті жағдайлар да жасалмаған. Химия кабинетінде су желісі тартылмаған, санитарлық-эпидемиологиялық талаптарға сәйкес келмейді. Физика кабинетіндегі зертханалық жұмыстар үшін қажетті ток көздері қарастырылмаған, бұл өз кезегінде оқушылардың тәжірибелік сабақтарын толыққанды өткізуге кедергі келтіреді. Мектеп 2014 жылы күрделі жөндеуден өтті деп есептелгенімен, шын мәнінде бұл тек ағымдағы жөндеумен шектелген. Ғимаратқа жаңа тыныс беру былай тұрсын, бұрыннан бар түйткілдер де шешілмеген. Мұндай жағдайда мектептің білім беру сапасын жақсартуды айтпағанда, оқушылар мен мұғалімдердің денсаулығы мен қауіпсіздігіне де алаңдауға тура келеді,-делінген жазбаша депутаттық сауалда.
Халық қалаулысы мәселені ашық көтерді. Ол талай шәкіртті тәрбиелеп, ұрпақтар сабақтастығын жалғап келе жатқан бұл білім ордасына жаңаша көзқараспен қарау қажеттігін алға тартып, мектепке күрделі жөндеу жүргізу және заманауи талаптарға сай қайта жабдықтау қажеттігін баса айтты. Бұл тек мектептің ғана емес, ауылдың, болашақ ұрпақтың мәселесі. Білім ордасының жай-күйі осындай күйде қала берсе, сапалы білім беру мен оқушылардың толыққанды дамуына мүмкіндік болмайтыны анық. Ендігі кезекте бұл мәселе шешімін тауып, тиісті органдар тарапынан нақты қадамдар жасалады деген үміт бар.
Ал күн тәртібіндегі келесі мәселе – аудандағы жастар саясатын іске асыру барысы туралы болды. Бұл жөнінде аудандық Ішкі саясат және тілдерді дамыту бөлімінің басшысы Серік Амиров баяндама жасап, жастарды қолдау және оларды қоғам өміріне белсенді араластыру мәселелеріне тоқталды. Талқылау барысында «NEET» санатындағы жастарды қоғамға бейімдеу жұмыстарының маңыздылығы ерекше атап өтілді. Оларды әлеуметтік ортаға тартуды күшейту, уақытша жұмыспен қамтылған жастардың тұрақты жұмыс табуына ықпал ету қажеттігі айтылды. Сондай-ақ, жастар арасындағы жұмыссыздықты азайту мақсатында аудандық жұмыспен қамту және әлеуметтік бағдарламалар бөлімі мен «Мансап» орталығының филиалымен бірлескен шаралар ұйымдастыру ұсынылды. Жастарға жаңа мүмкіндіктер ұсыну үшін түрлі семинарлар, кәсіби курстар өткізу, жұмыс жәрмеңкелерін ұйымдастыру қажеттігі назарға алынды. Жастар саясатын тиімді жүзеге асыру бағытында нақты ұсыныстар беріліп, аталған мәселелер бойынша тиісті мекемелерге тапсырмалар жүктелді.
Аудан тұрғындарының телефон байланысы мен интернет желісіне қолжетімділігін қамтамасыз ету мәселесі де сессияда кеңінен талқыланды. Бұл бағыттағы жұмыстар жөнінде «Желілік ресурстарды техникалық қолдау» орталығының инженері Ж.Зайтов баяндама жасады. Талқылау барысында аудан бойынша байланыс сапасын арттырудың маңыздылығы атап өтіліп, сала мамандарына бірқатар міндеттер жүктелді. Атап айтқанда, кадр тапшылығын болдырмау үшін мамандардың біліктілігін тұрақты түрде жетілдіру, байланыс желісі жүргізілген елді мекендерде қызмет сапасын жақсарту, 7 ауылдық округті талшықты-оптикалық желілермен қамтамасыз ету жұмыстарын жеделдету қажеттігі айтылды. Сонымен қатар, шалғайдағы елді мекендерді интернетпен қамту мәселесі басты назарға алынып, бұл бағыттағы жұмыстарды қатаң бақылауда ұстау тапсырылды. Осылайша, сессия барысында көтерілген мәселелер жан-жақты қаралып, алдағы уақытта орындалуға тиіс нақты міндеттер белгіленді. Аудан тұрғындарының өмір сүру сапасын жақсарту мен заманауи байланыс жүйелеріне қолжетімділігін қамтамасыз ету бағытында атқарылатын жұмыстар тұрақты бақылауда болмақ.
Сағыныш ҚАЙЫР
