Биыл қазақ әдебиетінің өркендеуіне елеулі үлес қосқан ақын, жазушы, қоғам қайраткері Әбу Сәрсенбаевтың туғанына 120 жыл толды. Ұлттық сөз өнерінде өзіндік қолтаңбасын қалдырған қаламгердің шығармашылық мұрасы бүгін де өз бағасын жоғалтпай, күннен күнге жаңа оқырман табуда.
Әбу Сәрсенбаев – халқымыздың қайталанбас болмысын, ел тұрмысы мен өмір шындығын көркем тілмен кестелеген суреткер. Оның қаламынан туған «Ақ Жайық», «Біздің ауылдың қызы», «Теңіз жағалай» секілді прозалық туындылары қазақ әдебиетінде шынайылық пен көркемдік үйлесімін арттырған шығармалар ретінде бағаланады. Жазушы кейіпкерлерінің жан дүниесін терең аша білуі, оқиға табиғатын дәл бейнелеуі оны әдеби қауымға кеңінен танытты.
Осыған байланысты «Бір өлке – бір жазушы» акциясы аясында қазақ әдебиетінің көрнекті өкілі, ақын-жазушы Әбу Сәрсенбаевтың өмірі мен шығармашылығын насихаттау мақсатында Х.Ерғалиев ауылдық кітапханасы игі шара ұйымдастырды.Шараға жалпы білім беретін Новобогат орта мектебінің 10-сынып оқушылары Ақерке Зинеш мен Гүлкөркем Есет қатысып, қазақ тілі мен әдебиеті пәнінің мұғалімі, педагог-сарапшы Нұрсұлтан Мұхамбетқалиев жетекшілігімен «Қазақ әдебиетінің көрнекті өкілі» тақырыбында эссе жазды. Жас буынның әдебиетке құштарлығын арттыруды көздеген бұл бастама оқушылардың шығармашылық қабілетін дамытуға, туған өлкеден шыққан қаламгерлердің мол мұрасын тереңірек тануына жол ашты.
Ақын ретінде де ол халқына үлкен рухани қазына қалдырды. Әбу Сәрсенбаевтың поэзиясы – туған жерге сүйіспеншілікке, адамгершілікке, достық пен еңбекті дәріптеуге толы. Оның өлеңдері қарапайымдылығымен, жүрекке жақын бейнелі тілмен ерекшеленеді. Қаламгердің балалар әдебиетіне сіңірген еңбегі де айрықша. Жас ұрпақтың ой-өрісін кеңейтетін, тәрбиелік маңызы зор әңгімелері мен өлеңдері оқушылардың сүйікті шығармаларына айналған. Балалар психологиясын дәл түсініп, олармен тіл табыса білетін қаламгердің бұл еңбектері қазақ балалар әдебиетінің дамуына тың серпін қосты.
Биылғы 120 жылдық мерейтой – жазушы еңбегіне көрсетілген құрмет қана емес, ұлт әдебиетінің құндылығын қайта жаңғыртудың, жас ұрпаққа тағылымды мұра қалдырудың жарқын көрінісі. Жергілікті қаламгердің шығармалары қазақ руханиятының алтын қорында мәңгі сақтала бермек.
Айгүл АХАТОВА,
Х.Ерғалиев ауылдық кітапхана меңгерушісі
