Қазақ елінің тәу етер тәуелсіздігін нығайта түсуіне, өзге жұртпен терезесі тең ел ретінде өз болашағына деген бағыт-бағдарын белгілеуіне және бүгінгі заманғы ұстанымына бастау болған, елдікке тұтқа заңдарының негізін қалаған Конституциямыздың қабылданғанына да 30 жыл уақыт болды. Бұл уақыт терезесінен қарасаңыз, көп мезгіл болып көрінбейтіні рас. Ал атқарылған істер мен жасалынған қам-қарекеттерге қарағанда аз мезгіл деуге де келмейді.
«Біз қазақ мал баққан елміз, ешкімге соқтықпай жай жатқан елміз, басымыздан құт-береке қашпасын деп, жеріміздің шетін жау баспасын деп, найзаға үкі таққан елміз. Ешбір дұшпан басынбаған елміз, басымыздан сөз асырмаған елміз, достықты сақтай білген елміз, дәм-тұзды ақтай білген елміз» деп қалың қазақтың қаз дауысты Қазыбек биі бабамыз атап кеткендей, қазақ халқы сонау Қазақ хандығының іргесі қаланғаннан берідегі сан қилы оқиғаларды, аумалы-төкпелі кезеңдерді бастан кешіп, кешегі тәуелсіздік алып, төбесі көкке жеткен күнге де жетті. Тәңірге тәубе, ата-бабаларымыз ғасырлар бойы арман еткен егемендігімізді еншіледік, ел болып еңсе түзедік.
Қазіргі таңда Қазақстан әлемдік саясатта, экономикада, өзге де салаларда өзіндік орны бар, бет-бейнесі қалыптасқан, мол мүмкіндіктерге ие мемлекетке айналды. Көптеген халықаралық ұйымдардың мүшесі де болды. Тәуелсіздік арқасында қол жеткізген жетістіктеріміз жетерлік. Кешегі бір замандарда амалдап күн кешкен қазақ енді бүгін еңсесін жоғары ұстап, «Мен қазақпын!» деп зор мақтанышпен айта алатындай жағдайға жетті. Осының барлығы Конституциямызды қабылдап, мемлекеттігімізді нығайтудың арқасында мүмкін болып отырғанын бүгінгі күні баса айтуымыз керек.
Баршаға белгілі, біздің Ата Заңымыздың алдымен көздейтіні – адам және оның өмірі, құқықтары мен бостандықтары. Ол Конституциямыздың бірінші бөліміндегі бірінші бабының бірінші тармағында «1.Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы - адам және адамның өмірі, құқықтары мен бостандықтары» деп тайға таңба басқандай айқын көрініп тұр. Яғни, ол өмірге келген кезінен бастап мемлекеттің ең қымбат қазынасы – бүкіл қазақстандықтарға қызмет етіп келеді. Ел көлемінде Ата Заң аясында жүзеге асқан жұмыстың бәрі, алда да атқарылар істер Отанымыз – Қазақстан, оның қымбат қазынасы – отандастарымыз үшін қолға алынып келді, жасалынып жатыр, атқарыла бермек.
Иә, еліміз үшін, еліміздің әрбір азаматы үшін қымбат да қасиетті Ата Заңы тәуелсіз Қазақстанның қоғамдық және мемлекеттік құрылысының іргелі қағидаттарын бекітіп, демократиялық институттардың дамуына қуат берді. Қоғамдық татулық пен саяси тұрақтылық, бүкіл халықтың игілігін көздейтін экономикалық даму, қазақстандық патриотизм және мемлекет өмірінің аса маңызды мәселелерін демократиялық әдістермен шешу – республика қызметінің түбегейлі принциптері болып бекітілді. Демек, Қазақстан Конституциясы – қазақ жерінде өмір сүретін барлық халық өкілдерінің бірлігіне, теңдігіне кепілдік беретін, сондай-ақ барлық билік тармақтарының қызметіне бағыт-бағдар беріп отыратын негізгі құжат. Еліміз бен қоғам тұрақтылығының, болашаққа деген сенім мен халқымыздың жақсы тұрмысының, лайықты өмірінің кепілі – Ата Заңымыздың мерейі үстем бола берсін дейік!
Жоламан ДӘУЛЕТИЯР
