Исатай аудандық білім бөліміне қарасты «Барыс» балалар-жасөспірімдер дене шынықтыру даярлық клубы және Исатай аудандық Жастар ресурстық орталығының бірлесе ұйымдастыруымен аудан жастары арасында “Ұлттық ойын-болашақтың мұрасы” ұранымен ІІІ ұлттық ойындар фестивалі өтті.
Аталмыш фестивалға аудан мектептерінен 100 ге жуық оқушы ұлттық ойынның 10 түрінен бақ сынасты.Атап айтсақ, олар асық ату, бес асық, белдесу, ләңгі тебу, бұқа тартыс, тартыспақ, тоғызқұмалақ, садақ ату, қой көтеру, арқан тартыс бойынша тартысты ойын өрнегін көрсетті.
Фестивальдің ашылу салтанатында алғы сөз легін алған Исатай ауданының әкімі Нұрым Мусин ұлттық ойындардың жастар мен қоғам үшін маңыздылығына тоқталып өтті. Сондай-ақ, осындай ұлттық ойындардың жалғасын таба беруіне тілектестік білдіріп, жылы лебізін жеткізді.
Аталмыш ІІІ ұлттық ойындар фестивалі аудан жастарының рухын көтеру, ұлттық мәдениетті дәріптеу, рухани мұрамызды насихаттау, халқымыздың дәстүрлі құндылықтарын жаңғырту мақсатында өткізілсе, әрі ауданымызға ҚР Чемпионатының 3 дүркін чемпионы әрі Моңғолия, Қырғыстан елдерінде өткен халықаралық турнирдің жеңімпазы, Катар елінде өткен халықаралық фестивальдің жеңімпазы, Қырғыстан елінде өткен көшпенділер ойының күміс жүлдегері, "Алтын тұғыр" иегері, Жылдың "үздік бүркітшісі", "үздік рекордшысы", 5-ші Дүниежүзілік көшпенділер ойындарының қола жүлдегері, халықаралақ дәрежедегі спорт шебері, құсбегі Арман Қошқаров іс-шараның мейманы болып, жастарымызға құттықтау сөзін жолдады.
Келесі кезекте облысымыздың бірнеше дүркін түйе палуаны, "Қазақстан барысы" жобасында облысымыздың мәртебесін талай мәрте абыроймен қорғаған, қазіргі таңда Астана қаласында ҚР туризм және спорт министрлігі, Республикалық ұлттық және ат спорты орталығы, бұқаралық іс-шараларды ұйымдастыру бақылау бөлімінің басшысы, самбо дзюдо, қазақ күресінен спорт шебері Кенжебек Сағатжанұлы сөз алып, қатысушыларға сәттілік тілеп, құттықтау тілегін жеткізді.
Осылайша, жоғары деңгейде өткен ұлттық ойындарынан сайысынан жалпы командалық есеп бойынша:
🥇- орын Ғ.Мәсәлімов орта мектебі,
🥈- орын Аққыстау орта мектебі,
🥉- орын Х.Наубетов орта мектептері жүлделі орындар иеленді.
Сонымен қатар, қазақ халқының ғасырлардан жалғасып келе жатырған ұлттық ойындары Қыз қуу мен Теңге алу сайыстары да ұйымдастырылып, көпшіліктің назарын аудартты.
Сондай-ақ, облысымыздың атын түрлі әлемдік сайыстарға танытып жүрген шара қонағы Арман Қошқаровқа ауданымыздағы демеушілер қатары қолдау білдіріп, ат мінгізіп, мұсылманның қасиетті мекені - Меккеге қажылыққа жолдама тарту етіп, сый-құрметтерін көрсетті.
Өз тілшіміз
