Исатай аудан әкімдігінің қолдауымен Манашта туылып, Алашқа танылған, ҚР-ның Халық Жазушысы, ақын, жерлесіміз Фариза Оңғарсынованың туғанына 85 жыл толуына орай аудандық «Жалын» мәдениет үйінде «Бір сергіп қайтсам ба екен елге барып» атты облыстық ән байқау өткізілді. Оған Атырау қаласы және аудандар бойынша жас өнерпаздардың қатысуымен 14 үміткер бақ сынасты.
Атап айтсақ, олар - Ардақ Дүзелбайқызы,Шархан Әбуғалиев (Атырау қаласы), Сағын Мамай, Сандуғаш Жукеева,Рита Тарихова (Махамбет ауданы), Ермек Айсынов, Айбар Күнтуаров (Құрманғазы ауданы), Айбек Ғасырбеков, Әсет Кеңесов (Индер ауданы), Мұрат Атенов, Айдар Бекетов, Алһам Рамазан (Исатай ауданы), Дастан Асан (Қызылқоға ауданы), Бекет Аманқос (Жылыой ауданы).
Ал өнерпаздардың өнерін таразылап, бағасын берген қазылар алқасына тоқтала өтсек, танымал композитор, «Ерен еңбегі үшін» медалінің иегері – Болат Қоқаманов, «Мәдениет саласының үздігі», Н.Жантөрин атындағы облыстық филормонияның көркемдік жетекшісі - Венера Машкалиева, облыстық ғылыми-әдістемелік халық шығармашылығы мәдени-демалыс қызметтерін ұйымдастыру орталығының әдіскері,облыстық, республикалық конкурстардың лауреаты –Райгүл Қабдолова, Жанбай саз мектебінің директоры, сарапшы мұғалім – Сағия Кемпірбаева, «Айгөлек» вокалды аспаптар ансамблінің негізін қалаушылардың бірі, ән өңдеуші әрі музыкант –Кенжемұрат Мажитов әділдік танытты.
Байқауға қатысушылар Ф.Оңғарсынованың өлеңдеріне жазылған әндерден бір ән орындау және өз қалауы бойынша атыраулық жергілікті сазгерлердің бір әнін орындау арқылы сынға түсті.
Осылайша, 4 сағатқа созылған облыстық ән-байқауы көптің көзайымына айналып үлгерді. Қатысушыларымыз да осал емес, бірінен бірі өтеді.Сахна мәдениетін де сақтап, образға сай киім үлгісін таңдап, байқау шарты бойынша әндерін нақышына келтіре орындады.
Нәтижесінде, атыраулық Ардақ Дүзелбайқызы, индерлік Айбек Ғасырбеков 3-орын, қызылқоғалық Дастан Асан 2-орын, құрманғазылық Ермек Айсынов 1-орын еншілесе, үздік болып, жоғары бағаланған исатайлық Мұрат Атенов Бас жүлдені иеленді.Сонымен қатар, басқа да қатысушылар Алғыс хат пен ынталандыру сыйлығына және қаржылай сертификаттарға ие болды.
Сағыныш ҚАЙЫР
