Президенттікке кандидат Салтанат Тұрсынбекова «Тәуелсіздік таңы» монументіне гүл шоқтарын қойып, 1986 жылғы Желтоқсан оқиғасы құрбандарын еске алды.
Ол желтоқсаншылардың ерлігінің арқасында бүгінде барша қазақстандықтардың ұлттық қадір-қасиеті мен құндылықтарын сақтай отырып, тәуелсіз елде өмір сүріп жатқанын атап өтті.
«Қазақстан Республикасының тәуелсіз мемлекет болғанына 31 жыл болды. Ол үшін талай қиындықты басынан өткерген халқымыз үшін Тәуелсіздік – ең асыл қазына. Тәуелсіздік – біздің орындалған арманымыз, бұл ең алдымен қазақ халқының азаттыққа ұмтылған ерлігінің жемісі», – деді кандидат.
«Тәуелсіздік таңы» монументі 2006 жылы 18 қыркүйекте Алматыда 1986 жылғы Желтоқсан оқиғасы құрбандарын еске алу мақсатында ашылған. Жобаның сәулетшісі әрі дизайнері – Тимур Сүлейменов. Ескерткіш ұлттық сананың өсуін және азаттықтың салтанат құруын бейнелейтін екі тіреуіштен тұрады. Композицияның ортасында тұрған қыз еркіндік символын білдіреді. Оң қолындағы орамал – адамдарды татулыққа шақыратын символ, сол қолында – бейбітшілік пен татулықтың символы, еркіндікке деген ұмтылысты бейнелейтін көгершін орнатылған.
Еске салайық, Салтанат Тұрсынбекова Алматыда тұтынушылардың құқықтарын қорғау мәселелері бойынша азаматтармен, зияткерлік меншікті қорғау тақырыбын қозғап қалалық құқық қорғаушылармен және қоғамдық пікір көшбасшыларымен, Қазақ ұлттық қыздар педагогикалық университетінің студенттерімен, сондай-ақ “Родник” дағдарыс орталығының басшысымен түрлі кездесулер өткізді.
Алматы – кандидаттың сайлау алдындағы үгіт-насихат сапарымен барған алтыншы өңірі. Құқық қорғаушы бұған дейін елордада, Қарағанды, Ақмола, Түркістан облыстары мен Шымкент қаласында болған.
Салтанат Тұрсынбекова штабының
Баспасөз-хатшылығы
