Апта сайын аудан тұрғындары асыға күтетін мерекелік сазды бағдарлама әлі де жалғасын табуда. Ауыл өнерпаздарын насихаттау, жас таланттарды анықтау, халыққа көңілді кеш сыйлау мақсатында ұйымдастырылған концерттік бағдарламаны бұл жолы Нарын ауылдық округінен келген өнерпаздар жалғастырды.
Нарын ауылы төрт түлігі сайланған, ата-бабамыздың ізін жалғастырып, ырыс- несібесін ырыздыққа айналдырған киелі өлке. Құмды өлкенің өрендерінің өнерден кем де болмауы да заңдылық. Сондықтан да мерекелік сазды кеште бірінен-бірі өткен әншілер мен мың бұралған бишілер өнер көрсетті. Сазды бағдарламаның алғы сөз кезегін алған Нарын ауылдық округінің әкімі Асқар Абуов аудан тұрғындарына өзінің жылы лебізін жеткізіп, өнерпаздар ұсынған кештің куәсі болуға шақырды.
Концертте жергілікті композиторлардан бөлек, қазақ вальсінің королі Шәмші Қалдаяқовтың әндерінен попурри шырқалып, егде жастағы көрермендер өткен шаққа сағынышпен саяхат жасағандай күйде болды. Тіпті, ортаға шығып, топтасып ырғалып билей жөнелді. Аға буын мен жастардың бір сахнада тоғысқан сәтін аудан халқы ерекше ықыласпен тамашалады. Әуезді ән мен мың бұралған биге көзайым болған көрермендердің де көңіл күйі көтеріңкі болды.
Шара соңында аудан басшысы Нұрым Мусин өзінің жылы лебізімен жеткізді.
-Аудан тұрғындарына мерекелік көңіл-күй сыйлау бағытында аудан әкімдігі арнайы мерекелік бағдарламаның кестесін жасақтап бекіткен болатынбыз. Сол кестеге сай әр аптаның бейсенбісінде күні бүгінге дейін Исатай, Зинеден мен Жанбай ауылдық округтері және міне өздеріңіз бүгін куә болған Нарын ауылдық округінің көркем өнерпаздары мерекелік кеш ұсынды. Осы сәтті пайдалана отырып, өзімнің және аудан тұрғындарының атынан өнерпаздарға алғысымыз шексіз. Алдағы апталарда концерттік бағдарламалар өз жалғасын таба бермек. Ендігі кезек Қамысқала, Тұщықұдық, Аққыстау ауылдық округтерінің еншісінде. Бұндай шаралардың өскелең ұрпақ үшін маңызы зор. Өнерге құрмет көрсетіп, рухани құндылықтарымызды дамытып, отансүйгіштікке тәрбиелеу басты мақсат. Сонымен қатар, аудан тұрғындарына мерекелік көңіл күй сыйлау,-деп ауылдық өнерпаздарға Алғыс хат табыстады.
Атап айтқанда, аудан әкімінің Алғыс хатына Нарын ауылдық округ өнерпаздарынан бөлек жекелей Эльназ Жанпейісқызы, Марта Ақылиденқызы және Жанбота Ерболатқызы ие болды.
