Жуырда 2022-2025 жылдар аралығына сайланған аудандық қоғамдық кеңестің өкілетті мерзімі аяқталып, тиісті заңдылықтарға сай оның кейбір мүшелерінің мүшелік мерзімдері аяқталуына байланысты қорытынды мәжілісі, сондай-ақ, жаңа құрамдағы аудандық кеңестің алғашқы отырысы өткен болатын.
Аталған кеңестің бұрынғы құрамы өздері өкілеттік еткен уақытта біраз жұмыстар атқарды. Сол үш жылда кеңес мәжілістерінде кезекті және кезексіз 39 мәселе қаралды. Оның бәрі отырыс хаттамаларында хаттаулы. Сондай-ақ, осы жылдар ішінде аудандық мәслихаттың шешімдері, аудан әкімдігінің қаулылары мен аудан әкімінің шешімдері жобаларына, былайша айтқанда, жергілікті мемлекеттік өкілді орган мен мемлекеттік атқарушы органның нормативтік-құқықтық акті-лері жобаларына барлығы 92 рет аудандық қоғамдық кеңестің ұсынымдарымен келісімдер берілген. Мұнымен бірге қоғамдық кеңес ауданның өзекті мәселелерімен облыстық мекеме, департамент, басқармалар басшыларына тікелей шығып, мәселеге орай түсініктер сұраған кездері де болды. Кеңес мүшелері бастамасымен соңғы жылдың өзінде үш дүркін кезектен тыс ауыз судың сапасы сын көтермейтіні туралы, аудан орталығының тазалығы мәселесі жөнінде, аудан көлемінде салынып жатқан құрылыс жұмыстарындағы кемшіліктерді жою бағытында мәселелер көтеріліп, кейін оның оң шешілуіне ықпал етілді.
Жиында осы және басқа да атқарылған жұмыстар туралы баяндалды. Сонымен бірге мүшелік мерзімі аяқталған кеңес мүшелеріне ауданымыздың әлеуметтік-экономикалық дамуы жолында оң шешімдер қабылдап, ауқымды жұмыстар атқарғаны үшін аудан әкімі Нұрым Мусин мен аудандық мәслихат төрағасы Аманжол Рахметовтің алғыс хаттары ұсынылып, оны аудан басшысы салтанатты жағдайда табыстады.
Бұдан кейін аудандық қоғамдық кеңестің жаңа құрамының алғашқы отырысы өтіп, онда жаңа құрамдағы аудандық қоғамдық кеңестің төрағасы мен алқа мүшелері сайланды. Мәжіліске аудан әкімі Нұрым Мусин, бұрынғы кеңес төрағасы Ерболат Насимуллин, БАҚ өкілдері қатысты.
Жиында кеңестің жаңа құрамы таныстырылып, төраға мен тұрақты комиссия мүшелері бекітілді. Жаңа құрамдағы аудандық қоғамдық кеңестің төрағалығына ауданның әлеуметтік-экономикалық және қоғамдық-саяси дамуына белсенді үлес қосып жүрген кәсіпкер Самат Байырханұлы Есенов сайланды. Кеңестің алқа құрамында кеңес мүшелері Нұрберген Утегенов, Құрманғали Мұхтаров, Самат Қабделов және Серікқали Әубәкіров бар.
Аудан әкімі Нұрым Бекежанұлы қоғамдық кеңестің жаңа төрағасының және кеңес мүшелерінің жұмысына сәттілік тілеп, кеңестің халықпен тығыз байланыста жұмыс істеуінің маңыздылығын атап өтті. Сондай-ақ, аудандық қоғамдық кеңестің жеке әлеуметтік желісін ашып, атқарылып жатқан жұмыстарды тұрғындарға ашық көрсетуді ұсынды.
Алғашқы отырыста, сондай-ақ, кеңестің негізгі міндеттері, алдағы жұмыс жоспары және аудандағы өзекті мәселелер талқыланды. Кеңес мүшелері тұрғындардың мүддесін қорғау, жергілікті басқару органдарының ашықтығын қамтамасыз ету және маңызды әлеуметтік-экономикалық мәселелерді шешу бағытында белсенді жұмыс жүргізетіндерін жеткізді. Осы мақсатта бірнеше тұрақты комиссия құрылды.
Экономикалық мәселелер жөніндегі комиссияны аудан әкімінің орынбасары Нұрберген Утегенов, «Жайықмұнайгаз» басқармасы құрылыс бөлімінің бастығы Еркебұлан Успанов және аудандық ішкі саясат және тілдерді дамыту бөлімінің бас маманы Венера Мұхитова құрады. Әлеуметтік мәселелер жөніндегі комиссия құрамына зейнеткерлер Самат Қабделов, Құрманғали Мұхтаров және Салауат Меңдіғазиев, сондай-ақ, аудандық аурухана директорының мейіргер ісі жөніндегі орынбасары Назым Идрисова енді. Ал заңдылықты сақтау және сыбайлас жемқорлыққа қарсы іс-қимыл жөніндегі комиссияның құрамында «Теңізшевройл» ЖШС бөлімше басшысы Серікқали Әубәкіров, аудандық құрылыс бөлімінің басшысы Алтынбек Қуанғали және «Нарын таңы» газетінің бас редакторы Жайна Мәлімқожа бар.
Жиын соңында кеңес мүшелері қоғаммен тығыз байланыс орнатып, аудан тұрғындарының пікірін ескеруге басымдық беретіндерін атап өтті. Қоғамдық кеңес алдағы уақытта да маңызды мәселелерді назардан тыс тас-тамай, олардың оң шешілуіне ықпал етуді мақсат тұтады.
Жоламан ДӘУЛЕТИЯР
