24-28 наурыз күндері Тараз қаласында параармрестлингтен Қазақстан чемпионаты өтті. Еліміздің үздік спортшылары бас қосқан додада Атырау облысынан жаттықтырушы Рүстем Құрмановтың жетекшілігімен 7 спортшы қатысып, тамаша нәтиже көрсетті. Олар жалпы саны 3 алтын, 4 күміс, 2 қола медаль еншілеп, өңір мерейін үстем етті.
Бұл жарыста исатайлық қос спортшы да жеңіс тұғырынан көрінді. Тұщықұдық ауылының тумасы Медет Супығалиев 65 кг салмақ дәрежесінде ІІІ орынға ие болса, қамысқалалық Асылан Қайрушев 90 кг салмақта қарсыластарын қапы қалдырып, алтын медальді жеңіп алды.
Асылан Қайрушев өз жеңісі жайлы былай деп бөлісті:
– Жарыс өте жоғары деңгейде ұйымдастырылды. Бұл ел чемпионатының ерекшелігі – спортшылар екі қолмен де күш сынасып, соңында көрсеткіштер қосылып бағаланады. Ал Азия чемпионатында оң және сол қол бойынша бөлек марапатталады. Қарсыластардың бәрі тыңғылықты дайындықпен келген. Десе де намысты қолдан бермей, алтын жүлдеге қол жеткіздім. Осы жолда қолдау білдірген Атырау облыстық «Мүгедектердің спорттық клубына», бізді баптаған жаттықтырушыларымыз Рүстем Құрманов пен Өтеген Тілеповке алғысым шексіз,-деп ризашылығын жеткізді чемпион.
Медет Супығалиев пен Асылан Қайрушев бұған дейін де талай дүбірлі додаларда бақ сынап, өз шеберліктерін дәлелдеген спортшылар. Олар тек өздерін шыңдап қана қоймай, ауданымыздың спорт саласына сүбелі үлес қосуда.
Сағыныш ҚАЙЫР
