«Бүгін облыс әкімі Махамбет Досмұхамбетов облыстың энергия жүйесінде олқылықтарды болдырмауға қатысты арнайы жиын өткізді» деп хабарлайды Атырау облыстық коммуникациялар қызметі.
«KEGOC» АҚ компаниясының ахуалдық орталығына барып, жасалып жатқан жұмыстарды көріп шықты. Сосын кеше өз тапсырмасымен құрылған жұмыс тобының есебін тыңдады. Жұмыс тобы құрамына әкімдіктің өкілдері, энергетикалық бақылау мен энергетикалық компаниялардың өкілдері кірген болатын. Кеше шұғыл түрде қолға алынған шаралардың арқасында облыс тұтынушыларын электр энергиясымен қамтамасыз ету толығымен қалпына келтірілді.
Батыс филиалының энергожүйесінде болған технологиялық ақаулар бұрынғы қабылданған инвестициялық жобаларды жедел түрде жүзеге асыруды қажет етеді. Аймақ басшысы энергия жүйесінде кінарат болмауды қамтамасыз ету үшін бірқатар тапсырмалар берді.
Еске сала кетейк, 10 қаңтар күні кешке «KEGOC» АҚ-ның электр желісінің 220 кВ Л-254-Орал-Индер, Л-201-Атырау-Индер және «Karabatan Utility Solutions» ЖШС-ның 2 генераторы уақытша істен шығып, салдарынан «Атырау Жарық» АҚ-ның электр желісін тұтынып отырған — Атырау қаласының сол жақ бөлігі мен аудандардағы кей елдімекендер уақытша электр желісінен ажырап қалған болатын.
