Киелі Нарын топырағы Исатай елінің төрі бұл жолы ерекше күйге бөленді. Жазғы жаңбыр себелеп тұрса да, көңілдері шайдай ашық исатайлықтардың жүректері әуезді әнге қанық болды. Өйткені ашық аспан астында Атырау облысына қарасты қала мен аудандардан жиналған вокалды аспаптар ансамбльдері бас қосып, аудан халқына рухани азық сыйлаған тамаша өнер мерекесі өтті. «Өнерлі өлке – ән мекен» атты облыстық вокалды аспаптар фестивалі шын мәнінде өңір руханиятының көркем көрінісіне айналды.
Аталған фестиваль аудандық мәдениет, дене шынықтыру және спорт бөлімінің жоспарына сәйкес, аудан әкімінің қолдауымен және «Жалын» мәдениет үйінің ұйытқы болуымен ұйымдастырылды. Мұндағы басты мақсат – аймақтарда жұмыс жасап жатқан вокалды аспаптар ансамбльдерінің өнерін дәріптеу, оларды жаңа биікке жетелеу, талантты орындаушыларды таныту, сондай-ақ жас ұрпақты отансүйгіштікке, туған жерге деген сүйіспеншілікке баулу болатын. Сонымен қатар бұл фестиваль — қалалар мен аудандар арасындағы шығармашылық ынтымақтастықты нығай-татын, достық пен мәдени байланысты тереңдететін маңызды алаңға айнала білді. Фестивальға Құрманғазы ауданынан «Толқын», Атырау қаласынан «Жас дәурен», Мақат ауданынан «Мақат әуендері», Махамбет ауданынан «Ауыл таңы», Индер ауданынан «Ақжайық» және Исатай ауданынан «Айгөлек» ансамбльдері қатысып, көпшіліктің ыстық ықыласына бөленді. Жеребе арқылы реттілігін анықтаған бұл ұжымдар сахна төрінде төрт бағыттағы әндерді орындады. Олардың қатарында туған жер мен Отанға арналған патриоттық ән, 80-90 жылдардағы ретро әуендер, жергілікті композиторлардың шығармалары және қазіргі заманғы заманауи әндер болды. Бұл талаптар ансамбльдердің кәсіби дайындықтарын, сахнадағы үйлесімін, орындаушылық шеберліктерін айқын көрсетті. Әр ұжым өз өнері арқылы көрермен жүрегіне жол тауып, әсерлі сәттер сыйлай білді.
Кеш барысында жанды дауыстағы орындаулар мен түрлі музыкалық аспаптардың үндестігі сахнаның шырайын келтірді. Көрермендер арасында шабытты күйге бөленгендер көп болды. Олар жауын-шашынға қарамастан Тәуелсіздік алаңына қарай ағылып, өнерпаздарды ерекше ықыласпен қарсы алды. Фестивальға қатысқан әрбір ансамбльге көрсетілген қошемет те, қол соғу да, ілтипат та ерекше болды. Көршілес Махамбет ауданының «Ауыл таңы» ансамблінің жетекшісі Өмірбек Нәжімиденов аудан жұртшылығының жылы құшағын айрықша атап өтті.
- Эстрадалық ән мен жанды дауыстағы шынайы өнердің айырмашылығына тоқталсақ, екеуінің арасы жер мен көктей деп айтар едім. Себебі эстрадалық әннің қазіргі жай күйі, жаздырып айту қалың көрерменді әбден шаршатып тастағандай. Ал вокалды аспапты ансамбльдердің сахнадағы рөлі өте ерекше.Түрлі музыкалық аспаптарды бір арнаға тоғыстырып, үйлесімді әуен шығару үлкен дайындық пен кәсіби машықты қажет ететінін атап өткім келеді. Сонымен бірге бүгінгі фестивальдің ерекшелігі көптен бері сахнадан көрінбей кеткен Исатай ауданының «Айгөлек» ансамблінің қайта сахнаға шығуын қуанышпен қабылдадық. Бұл – өнердің өлмейтінін, оның ел жадында сақталып, қайта жаңғырып отыратынын дәлелдеген сәт болды десем артық айтқаным емес,-деді өз сөзінде.
Кеш соңында аудан әкімінің орынбасары Жақсылық Жанұзақов құттықтау сөз сөйлеп, аудан халқына тамаша көңіл-күй сыйлаған ансамбльдерге шынайы ризашылығын білдірді. Барлық ұжымға аудан әкімінің Алғыс хаттары мен 200 000 теңге көлеміндегі қаржылай сертификаттар табыс етілді. Бұл өнерпаздарға берілген құрмет пен қолдаудың нақты көрінісі.
Осындай фестивальдар — руханияттың шамшырағы, ел ішіндегі талантты жандарға жол ашатын жарқын алаң. Әуенмен өрілген Аққыстау аспанында сол күні шынайы өнердің сазы жаңғырып, халықтың жүрегіне жол тапты. «Өнерлі өлке – ән мекен» деген атауының өзі ақиқатқа айналған бұл кеш – өнерге деген құрметтің, бірлік пен рухтың мерекесі болды.
Еркебұлан УАЛИТХАН
