Новобогат балалар саз мектебінде білім бөлімінің «Төрт тоқсан – төрт өнер» ұлттық мәдени-ағартушылық жобасы аясында танымал ақындардың шеберлік сыныбы өткізілді.
Осы мақсатта мектебімізде жерлесіміз облыстық, республикалық ақындар айтысының жүлдегері, Бас жүлде иегері, Мәдениет саласының үздігі , «Құрмет белгісі» төсбелгісімен марапатталған ақын Нұрманов Саадат Шаяхметұлымен кездесу өтті. Оқушыларымыз ақынның Отан,тіл, туған жер секілді патриоттық өлеңдерімен кеңірек танысты. Сондай-ақ, жерлесімізге шығармашылығы, өмірлік ұстанымдары туралы сұрақтар қойылды. Әндер шырқалып, күй тартылып, сырнайда сазды әуендер ойналды. Сөйтіп жылы жүзді, дархан жүректі айтыскер ақынның ғибратты әңгімесінен оқушылар ерекше әсер алды. Тәрбиелік шараны А.Тұхпатова ұйымдастырса, қобыз пәні мұғалімі Г. Исакулова жүргізіп отырды.
Кеште Н.Жақсымбетованың жетекшілігіндегі домбырашылар ансамблі Құрманғазының күйі «Балбырауын» мен Т.Жақиннің «Дала рухын», терме сыныбының оқушысы Ж.Жасталап «Он алты қыз» халық әнін, ал сырнай аспабында М.Жұбаныш «Финская фольканы» орындап, кештің сәнін келтірді.
Жеңісгүл Алипова, Новобогат балалар саз мектебінің домбыра пәні мұғалімі
