Таяуда Қызылорда облысы, Сырдария ауданында дзюдодан 2009-2010 жылы туған жасөспірімдер арасында өткен «Абай-Даулет» жүлдесіне арналған ашық республикалық турнир өз мәресіне жетті. Дүбірлі додаға Өзбекстаннан және еліміздің түкпір-түкпірінен 500-ге жуық жас дзюдошы жиналып, өз шеберліктерін сынға салды.
Бұл айтулы бәсекеде Исатай аудандық балалар-жасөспірімдер спорт мектебінен 5 қыз бала қатысып, өздерінің қайсарлығын көрсетті. Солардың ішінде ерекше көзге түскені – 40 кг салмақ дәрежесінде сынға түскен Нұрай Нұрланқызы. Ол турнир барысында қарсыластарын айқын басымдықпен жеңіп, финалға жолдама алды. Шешуші сында шымкенттік балуанға соңғы минуттарда ғана есе жіберіп, күміс жүлдеге ие болды. Жаттықтырушысы Алтынгүл Құттыбаева шәкіртінің бұл жетістігіне ризашылығын білдіріп, жарыстың жас спортшылар үшін үлкен тәжірибе алаңы болғанын атап өтті.
– Нұрай ақтық сында соңына дейін табандылық танытты. Ол осы жарыста «Спорт шеберлігіне үміткер» атағын орындады. Бұл – оның спорттық жолындағы үлкен қадамы. Жалпы мен бұл турнирге бес шәкіртімді апардым. Барлығы өз мүмкіндіктерін көрсетіп, жақсы нәтиже үшін барын салды. 63 кг салмақ дәрежесінде Асылай Нұрбайқызы да намысты қолдан бермеуге тырысып, қанағаттандыру кезеңінде жарысты 7-орынмен аяқтады. Бастысы, мұндай бәсекелер жас спортшыларымызды шыңдап, оларды үлкен жетістіктерге бастайды деп сенемін. Алдағы уақытта бұдан да биік белестерді бағындыруды мақсат етіп отырмыз, - дейді жаттықтырушы.
Исатайлық жас дзюдошылардың бұл жетістігі – олардың еңбегі мен табандылығының нәтижесі. Алда әлі талай жарыстар күтіп тұр. Біз жас спортшыларымызға сәттілік тілейміз!
Сағыныш ҚАЙЫР
