Әлем халқының 51 пайызы футболға жанкүйер екені баршаға белгілі. Қазақ футболы жайлы сөз қозғалғанда, көбіне көңіліміз құлазитыны жасырын емес. Футбол десе ішкен асын жерге қоятын қазақ жанкүйерлерінің шетелдік командалар мен ойыншыларға қолдау көрсетуден басқа амалы жоқ еді.
Дегенмен соңғы жылдары ел футболы жаңа серпін алуда. 26 тамыз күні алматылық «Қайрат» командасы шотландиялық «Селтикті» тізе бүктіріп, УЕФА Чемпиондар лигасының негізгі кезеңіне жолдама алғаны – қазақ футболының тарихындағы алтын әріппен жазылар сәт болды. Матчтың басты қаһарманы атыраулық 21 жастағы қақпашы Темірлан Анарбековтің 120 минут бойы қақпасын қорғап сақтап, пенальти сериясында қарсыластың үш соққысын қайтарғаны күллі жанкүйерді дүр сілкіндірді. Бұл жеңіс қазақ баласының да футболда биікке шыға алатынын дәлелдеген айқын мысалға айналды.
Мемлекет басшысы Қасым-Жомарт Тоқаев бұқаралық спортқа ерекше көңіл бөлу керектігін атап өтсе, соның нәтижесінде ауыл-аймақтарда түрлі турнирлер ұйымдастыру қарқын ала бастады. Солардың бірегейі – 1 айға созылған Тұщықұдық футбол лигасы. Жергілікті 12 команда қатысқан дода жанкүйерлерге ерекше көңіл-күй сыйлап, ойыншыларға үлкен тәжірибе болды. Жарыстың жабылу салтанатында аудан әкімі Нұрым Мусин сөз сөйлеп: «Бұл лига – тек спорттық дода ғана емес, бірлік пен ынтымақтың мерекесі. Жастардың бүгінгі шеберлігіне қарап, болашақ чемпиондар осы топтың арасынан шығатынына сенімдімін. Осындай жарыстар ел намысын қорғап, абыройын асқақтататын жаңа есімдердің тууына жол ашады. Әрбір ойыншы – біздің мақтанышымыз» деп атап өтті.
Жекелей номинациялар бойынша «Үздік ойыншы» Сағындық Жарасхан, «Үздік шабуылшы» Төребаев Қалыбек, «Үздік қорғаушы» Бақтығұлов Данабек, «Үздік сұрмерген» Қожасов Равиль, «Үздік қақпашы» Каримов Абылай, «Үздік легионер» Шапихов Бекзат, «Үздік ардагер ойыншы» Бахитов Ануарбек, «Үздік команда капитаны» Мерей Айдос атанды. Ал командалық есепте жас өрендерден құралған «Майнц 05» үшінші орын иеленсе, небәрі бір ұпай айырмасымен чемпиондықты қолдан шығарып алған «Барыс 98» күміс жүлдені қанағат тұтты. Ал қарсыластарынан оза шапқан «Rule Breakers» командасы лиганың алғашқы чемпиондары атағына ие болды.
Тұщықұдық лигасы – ауыл спортының дамуына, жастардың шынығуына зор серпін берген дода болды, ал «Спорт – денсаулық кепілі ғана емес, елдік рухтың тірегі, бірлік бар жерде береке, береке бар жерде жеңіс бар» деген ой оның мәнін айқындай түсті.
Еркебұлан УАЛИТХАН
